މީގެ 46 އަހަރު ކުރިން އަމީތާބް ބައްޗަންގެ ވަރަށް ކާމިޔާބު ފިލްމެއް "މުގައްދަރު ކާ ސިކަންދަރު" ގެ ނަމުގައި ގެނެސްދީފައިވެ އެވެ. އެކަމަކު އެއާ އެއްވެސް ގުޅުމެއް ނެތް ގޮތަށް މިހާރު ބެލުންތެރިންނަށް ގެނެސްދޭން ތައްޔާރު ވަނީ "ސިކަންދަރު ކާ މުގައްދަރު" އެެވެ.
މި މަހުގެ 29 ގައި ނެޓްފްލިކްސް އިން ޕްރީމިއާކުރަން ހަމަޖެހިފައިވާ މި ފިލްމަކީ ނީރަޖް ޕާންޑޭ ލިޔެ، ޑައިރެކްޓްކޮށްފައިވާ ތުރިލާއެކެވެ. "ސިކަންދަރު ކާ މުގައްދަރު" ގެ ތަރިންނަކީ ޖިމީ ޝެރްގިލް އާއި ތަމަންނާ ބާޓިއާގެ އިތުރުން އަވިނާޝް ތިވާރީ އެވެ. އިތުރު ކާސްޓުންގެ ތެރޭގައި ދިވްތާ ދައްތާ އާއި ރަޖީވް މެހެތާ ވެސް ހިމެނެ އެވެ.
ބެލުންތެރިންނަށް ނީރަޖް "ސިކަންދަރު ކާ މުގައްދަރު" ގެނެސްދޭ އިރު، އޭނަގެ އެންމެ ފަހުގެ ފިލްމަކީ މި އަހަރުގެ އޮގަސްޓްގައި ގެނެސްދިން ލޯބީގެ ފިލްމު "އޯރޯ މޭ ކަހާ ދަމް ތާ" އެވެ. ބެލުންތެރިމްގެ ވަރަށް ފިނި ތަރުހީބެއް ލިބުނު އެ ފިލްމުގެ ތަރިންނަކީ އަޖޭ އާއި ތައްބޫގެ އިތުރުން ޖިމީ އެވެ.
ނީރަޖް ކުރިން ވަރަށް ކާމިޔާބު އުފެއްދުންތަކެއް ގެނެސްދީފައިވެ އެވެ. އޭގެ ތެރޭގައި 2008 ގެ "އަ ވެނިޒްޑޭ" އާއި 2013 ގެ "ސްޕެޝަލް 26" އާއި 2015 ގެ "ބޭބީ" އަދި 2016 ގެ ގެ "އެމްއެސް ދޯނީ: ދި އަންޓޯލްޑް ސްޓޯރީ" ފާހަގަކޮށްލެވެ އެވެ.