ރާއްޖޭގެ ކޮންމެ އަތޮޅަކުން އަސާސީ ރޭޓެއްގައި ތެޔޮ ލިބޭނެ އިންތިޒާމު ހަމަޖެއްސުމަށް، ފިއުލް ސްޓޯރޭޖްތައް ގާއިމުކުރުމުގެ މަޝްރޫޢު މިއަދު އިފުތިތާހުކޮށްފި އެވެ.
ރައީސް އޮފީހުގައ ހެނފުނު ބޭއްވި ރަސްމިއްޔާތުގައި އެކަން އިފުތިތާހުކޮށް ދެއްވީ ރައީސް ޑރ.މުގައްމަދު މުއިއްޒެވެ.
ތެލަކީ އަސާސީ ހިދުމަތެއްގެ ގޮތުގައި ކަނޑައަޅައި، ކޮންމެ އަތޮޅެއްގައި މަދުވެގެން އެއް ރަށުގައި އެސްޓީއޯ ރޭޓުގައި އާންމުންނަށް ޕެޓްރޯލާއި ޑީސަލް ލިބޭނެ ފަސޭހަ އިންތިޒާމެއް ހަމަޖެއްސެވުމަކީ ރައީސްގެ ރިޔާސީ ވައުދެއް ވެސް މެ އެވެ.
އެގޮތުން މިއަދު އިފުތިތާހުކުރޮ މަޝްރޫޢާއެކު މަސްވެރިންނަށާއި އާންމުންނަށް ހެޔޮ އަގެއްގައި ތެޔޮ ލިބޭނެ އިންތިޒާމު ހަމަޖެހޭނެ އެވެ.
އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހީމް ވިދާޅުވީ މީގެ ދަށުން މިދިޔަ ގެ ޖޫން މަހުގެ ތެރޭގައި ހުޅުމާލޭގައި އެސްޓީއޯ ރޭޓުގައި ތެޔޮ ލިބޭނެ އިންތިޒާމު ހަމަޖައްސާފައިވާ ވާކަމަށެވެ. އަދި މި މަޝްރޫޢުގެ ދަށުން 19 ރަށެއްގައި މި އިންތިޒާމުތައް ހަމަޖައްސައި 2026 ގެ ފެބްރުއަރީގެ ކުރިން މަޝްރޫޢުގެ މަސައްކަތް ނިންމުމަށް އެސްޓީއޯއިން އަމާޒު ހިފާފައިވާ ކަމަށް ވެސް ވިދާޅުވި އެވެ.
ޝިމާދު ވިދާޅުވީ މަސްވެރިކަން ކުރިއަރަމުން އަންނަ މިންވަރަށް ބަލައި އިތުރު ރަށްރަށުގައި ވެސް މި އިންތިޒާމުތައް ހަމަޖައްސާނެ ކަމަށެވެ.
ފިޝަރީޒް މިނިސްޓަރު އަހުމަދު ޝިޔާމް ވިދާޅުވީ އަލަށް މި ފެށި މަޝްރޫއާ އެކީ މަސްވެރިންނަށް ގިނަ ފަސޭހަތަކަކާއި ލުއިތަކެއް ލިބޭނެ ކަމަށެވެ.
"އަގުބޮޑުކޮށް މަސްވެރިން ތެޔޮ ގަންނަންޖެހޭ ޖެހުމަށް، ދާއިމީ ޙައްލެއް ހޯދުމުގެ މަސައްކަތް މި ފެށީ. މީގެ ކޮންމެ ތަނަކީ ގާތްގަނޑަކަށް އަށެއން ނުވަތަ ނުވަ މިލިޔަން ރުފިޔާގެ އިންވެސްޓުމަންޓެއް،" އޭނަ ވިދާޅުވި އެވެ. "އަދި ޑިމާންޑު އޮތް މިންވަރަކުން ތަންތަން އިތުރުކުރާނެ."
މަޝްރޫޢުގެ ދަށުން ފެލިވަރާއި ކޫއްޑޫގައި ވެސް ތެޔޮ ރައްކާކުރާނެ ެޒަމާނީ ތަންތަން ގާއިމުކޮށް މަސްވެރިންނަށް ފަސޭހައިން ތެޔޮ ފޯރުކޮށްދިނުމުގެ އިންތިޒާމު ހަމަޖެއްސުމަށް ވަނީ ނިންމައިފަ އެވެ.