އިންޑިއާގެ މަޝްހޫރު ފިލްމީ ތަރި، ކަމަލް ހަސަންގެ "ތަގް ލައފް" ރިލީޒްކުރާ ތާރީހާ އެކީ ފިލްމުގެ ފަސްޓްލުކް ޕޯސްޓަރު ދައްކާލައިފި އެވެ.
ކުޅަދާނަ ޑައިރެކްޓަރު މަނީ ރަތުނަމްގެ މި ފިލްމު ސިނަމާތަކަށް ގެންނަން ނިންމީ އަންނަ އަހަރުގެ ޖޫން 5 ގަ އެވެ. "ތަގް ލައިފް" އަކީ 35 އަހަރު ފަހުން މަނީ ރަތުނަމްއާ އެކީ ކަމަލް ހަސަން މަސައްކަތްކުރާ ފުރަތަމަ ފިލްމެވެ. އެ ދެ މީހުން އެކީގައި މަސައްކަތްކުރި ފުރަތަމަ ޕްރޮޖެކްޓަކީ 1987 ގެ އެޕިކް ކްރައިމް ޑްރާމާ "ނަޔަކަން" އެެވެ.
ގޭންގްސްޓާ އެކްޝަން ޑްރާމާއެއްފެ ގޮތުގައި ގެނެސްދޭ "ތަގް ލައިފް" ގެ ކާސްޓްގައި ދެކުނާއި ބޮލީވުޑްގެ މަސްހުނި ކާސްޓެއް ހިމެނެ އެވެ. އެގޮތުން ފިލްމުން ފެންނާނެ ބޮލީވުޑްގެ ފަންނާނުންގެ ތެރޭގައި ސާނިއާ މަލްއުތުރާ، އަލީ ފަޒަލް އަދި ޕަންކަޖް ޓްރިޕަތީ ހިމެނެ އެވެ.
މަނީ ރަތުނަމްގެ އެންމެ ފަހުގެ ފިލްމަކީ ދެ ބަޔަކަށް ގެނެސްދިން "ޕޮނިޔިން ސެލްވަން" އެވެ. އައިޝްވާރިއާ ރާއީ ބަތަލާގެ ރޯލު ކުޅުނު ފިލްމުގެ ދެވަނަ ބައި ރިލީޒްކުރީ މިދިޔަ އަހަރުގެ އެޕްރީލްގަ އެވެ.
ކަމަލް ހަސަންގެ އެންމެ ފަހުގެ ފިލްމަކީ ޖުލައިގައި ރިލީޒްކުރި "އިންޑިއަން 2" އެވެ. މީގެ ތިން ވަނަ ބައިގެ މަސައްކަތް ވެސް އަދި ކުރިއަށް އެބައޮތެވެ.