އަންނަ ހަފުތާގައި މެކްސިކޯގައި ބާއްވާ 73 ވަނަ މިސް ޔުނިވާސް މުބާރާތް ބަލާލަން މެކްސިކޯ އަށް ދާން ޝައުގުވެރިވާ ދެ މީހަކަށް ރާއްޖެ އިން އެ މުބާރާތުގައި ވާދަކުރާ މަރިޔަމް ޝައިނާ ނަސީމްގެ ފަރާތުން ފުރުސަތު ދޭން ނިންމައިފި އެވެ.
އެގޮތުން ދެ ޓިކެޓް ދޭ ހާއްސަ ޕްރޮމޯޝަނެއް ވަނީ ފަށައިފަ އެވެ.
ޝައިނާ އިންސްޓަގްރާމްގައި ހިއްސާކުރި ރީލްއެއްގައި ބުނީ މި މަހުގެ 14-16 އަށް މެކްސިކޯ ސިޓީގައި ބާއްވާ މިސް ޔުނިވާސްގެ ހުޅުވުމުގެ ރަސްމިއްޔާތާއި ފައިނަލް ކޮމްޕެޓިޝަން ބަލާލުމަށް ދެ މީހަކަށް ޓިކެޓް ދިނުމަށްނިންމާފައިވާ ކަމަށެވެ.
އެހެންވެ މި ޕްރޮމޯޝަންގައި ބައިވެރިވުމަށް ކުރަންޖެހޭ ކަންކަން އޭނަގެ ޕޯސްޓްގެ ކެޕްޝަންގައި ހިއްސާކޮށްފައިވެ އެވެ. އެގޮތުން އޭނަގެ ރީލް އަށް އެ މުބާރާތުގައި ބައިވެރިވުމަށް ހިޔާރުކުރަންވީ ސަބަބު ކޮމެންޓް ކުރުމާއި، ފަސް ރައްޓެހިން ޓެގްކުރުމާއި މިސް ޔުނިވާސްގެ އޮފިޝަލް އިންސްޓަގްރާމް އެކައުންޓާއި ޝައިނާގެ އެކައުންޓް ފޮލޯ ކުރުން ހިމެނެ އެވެ.
މީގެ އިތުރުން ސައިނާގެ ރީލް އެ މީހެއްގެ އިންސްޓަގްރާމް ސްޓޯރީގައި ޝެއާކޮށް އޭނަ އާއި މިސް ޔުނިވާސް އޮފިޝަލް އެކައުންޓް ޓެގް ކުރުމަށް ވެސް އެދިފައިވެ އެވެ.
ދުނިޔޭގައި ދެވަނަ އަށް ބާއްވާ އެންމެ ބޮޑު ރީތީގެ މުބާރާތުގައި އަލަށް ދިވެއްސަކު ވާދަކުރާ އިރު، ސަރުކާރުން ވަނީ އެކަން ކުށްވެރިކޮށް، ސައިނާ މުބާރާތުގައު ވާދަކުރުން ހުއްޓައިލަން ގޮވާލައިފަ އެވެ. ރާއްޖެ ހިމެނެނީ މި އަހަރުގެ މުބާރާތުގައި އަލަށް ވާދަކުރާ 11 ގައުމުގެ ތެރޭގަ އެވެ.
މިސް ޔުނިވާސްގައި 127 ގައުމަކުން ވާދަކުރެ އެވެ.