މޯލްޑިވްސް އިސްލާމިކް ބޭންކް (އެމްއައިބީ) އިން ރާއްޖޭގެ އިތުރު 19 ރަށެއްގައި އޭޓީއެމްގެ ހިދުމަތް ގާއިމު ކުރުމުގެ އެއްބަސްވުމެއްގައި އިކޮނޮމިކް މިނިސްޓްރީއާ އެކު ސޮއިކޮށްފި އެވެ.
އެ އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ މިނިސްޓަރު އަހުމަދު ސައީދެވެ. އެމްއައިބީގެ ފަރާތުން ސޮއިކުރެއްވީ އެ ބޭންކުގެ ސީއީއޯ މުފައްދަލް އިދުރީސް އެވެ.
މުފައްދަލް އިދުރީސް ވިދާޅުވީ އާ މަޝްރޫއުގެ ދަށުން އަންނަ އަހަރު ހަތަރު އަތޮޅެއްގެ 19 ރަށުގައި 23 އޭޓީއެމްއެއް ގާއިމު ކުރާނެ ކަމަށެވެެ. އޭގެ ތެރޭގައި ހިމެނެނީ ދިވެހި ރުފިޔާ 22 އޭޓީއެމްގެ އިތުރުން ޑޮލަރު އޭޓީއެމެކެވެ.
އެމްއައިބީން މިހާރު ވެސް އަންނަނީ ރާއްޖޭގެ 12 އަތޮޅެއްގެ 18 ރަށެއްގައި 39 އޭޓީއެމް މެދުވެރިކޮށް ހިދުމަަތް ދެމުންނެވެ. އޭގެ ތެރޭގައި ހިމެނެނީ ރުފިޔާގެ 34 އޭޓީއެމާއި އަދި ޑޮލަރުގެ ފަސް އޭޓީއެމެވެ. އަދި އެމްއައިބީގެ ހަ ބްރާންޗަކާއި ހަ ސޭލްސް ސެންޓަރުގެ އިތުރުން ހަ އޭޓީއެމް ކިއޮސްކުން ވެސް އަންނަނީ އެކި ތަންތަނުގައި ހިދުމަތް ދެމުންނެވެ.
އޭޓީއެމްގެ ހިދުމަތް ފުޅާ ކުރުމަށް ހިންގާ މަޝްރޫއު އަންނަ އަހަރު ނިމޭ އިރު 16 އަތޮޅެއްގެ 37 ރަށެއްގައި އެމްއައިބީގެ 62 އޭޓީއެމްއަކުން ހިދުމަތް ދޭނެ އެވެ. އެއީ ރުފިޔާގެ 56 އޭޓީއެމާއި ޑޮލަރުގެ ހަ އޭޓީއެމާ އެކީގަ އެވެ.