ބޮލީވުޑްގެ މަޝްހޫރު ފިލްމީ ތަރި ޝާހްރުކް ޚާން މަރައިލާނެ ކަމަށް ބުނެ ދިން އިންޒާރަކާ ގުޅިގެން ފުލުހުން އެ މައްސަލަ ވަރަށް ސީރިއަސް މައްސަލައެއްގެ ގޮތުގައި ތަހުގީގު ކުރަން ފަށައިފި އެވެ.
މީޑިއާތަކުން ރިޕޯޓްކޮށްފައިވާ ގޮތުގައި 59 އަހަރުގެ އެކްޓަރު މަރައިލާނެ ކަމަށް ބުނެ އިންޒާރުގެ ކޯލެއް ލިބުނީ މުމްބާއީގެ ބަންޑްރާ ޕޮލިސް ސްޓޭޝަނަށެވެ. އެގޮތުން ކާކުކަން ނޭނގޭ ގޮތަށް ގުޅި މީހާ ޝާހްރުކް މަރުން ސަލާމަތް ކުރަން ބޭނުން ނަމަ 50 ލައްކަ ރުޕީސް ދޭން ޑިމާންޑްކޮށްފައިވެ އެވެ.
މި މައްސަލައިގައި ތަހުގީގުގެ ތެރެއިން ފުލުހުން މިހާރު ވަނީ ކޯލް ކުރި ސަރަހައްދާއި ކޯލްކުރި މީހާ ދެނެގެންފަ އެވެ. އެގޮތުން އެ ކޯލް އައިސްފައި ވަނީ ޗަތިސްގަޅްގެ ރައިޕޫރުންނެވެ. އަދި އިންޒާރު ދިނީ ފައިޒަން ކިޔާ މީހެކެވެ. މިކަމާ ގުޅިގެން މިހާރު އޭނަ ހޯދަން ފުލުހުންގެ ހާއްސަ ޓީމެއް ރައިޕޫރްގައި ހަރަކާތްތެރިވަމުން އަންނަ ކަމަށް ވެސް މީޑިއާތަކުން ބުންޏެވެ.
ޝާހްރުކަށް އެންމެ ފަހުން މަރުގެ އިންޒާރު ދިނީ މިދިޔަ އަހަރުގެ ކުރީކޮޅު ރިލީޒްކުރި އޭނަގެ "ޕަތާން" އަށް ލިބުނު ބޮޑު ކާމިޔާބީއާ ގުޅިގެންނެވެ.
ޝާހްރުކަށް މަރުގެ އިންޒާރު އަލުން ދިން އިރު، ސަލްމާން ޚާނަށް ތަކުރާރުކޮށް މަރުގެ އިންޒާރު ލިބޭތާ ދެ އަހަރެއްހާ ދުވަސްވެއްޖެ އެވެ. ދާދި ފަހުން އޭނަގެ ގެލެކްސީ އެޕާޓްމަންޓަށް ބަޑީގެ ހަމަލާތަކެއް ވެސް ދީފައިވެ އެވެ. ސަލްމާނަށް ލިބެމުންދާ މަރުގެ އިންޒާރުތަކާ ހެދި މުމްބާއީ ފުލުހުން އޭނަގެ ސެކިއުރިޓީ ވަރަށް ބޮޑަށް ވަރުގަދަކޮށްފައިވެ އެވެ.