"މޯލްޑިވިސް އެންހޭންސިން އެމްޕްލޮޔަބިލިޓީ އެންޑް ރެޒިލިއަންސް އޮފް ޔޫތް (މީރީ) ޕްރޮޖެކްޓްގެ ފަރާތުން ކުރިއަށް ގެންދަން ހަމަޖެހިފައިވާ "ފިއުޗަރ-ރެޑީ ޔޫތް ޕްރޮގްރާމް ޔޫތު" ޕްރޮގްރާމް އިފްތިތާހުކޮށްފި އެވެ.
މިއީ މީރީ ޕްރޮޖެކްޓްގެ އެއްބާރުލުމާ އެކު، ހަޔަ އެޑިއުކޭޝަން މިނިސްޓްރީން އިންތިޒާމްކޮށްގެން ކުރިއަށް ގެންދިޔުމަށް ހަމަޖެހިފައިވާ ތަމްރީން ޕްރޮގްރާމެކެވެ. އެގޮތުން މި ޕްރޮގްރާމްގެ ދަށުން، ފަތުރުވެރިކަން، އިމާރާތްކުރުން، އައިސީޓީ، މަސްވެރިކަން އަދި ދަނޑުވެރިކަން ފަދަ ރާއްޖެއަށް ބޭނުންވާ އެކި ދާއިރާތަކުން ނެޝަނަލް ސެޓްފިކެޓް ލެވެލް 3 ގެ 30 ކޯހެއް ކުރިއަށް ގެ ގެންދަން ހަމަޖެހިފައިވެ އެވެ.
އެގޮތުން އުމުރުން 16-35 އަހަރާއި ދެމެދުގެ ޒުވާނުންނަށް ޙާއްސަކޮށް ކުރިއަށްގެންދާ މި ޕްރޮގްރާމްގެ ދަށުން ޖުމްލަ 1،000 ޒުވާނުންނަށް ތަމްރީނުވުމުގެ ފުރުޞަތު ވަނީ ހުޅުވާލައިފަ އެވެ.
ރާއްޖެއަށް އެންމެ ބޭނުންވާ ދާއިރާތަށް ދެނެގަނެ، އެ ދާއިރާތަކުން ޒުވާނުން ތަމްރީނުކުރުމަކީ ރައީސް ޑރ. މުޙައްމަދު މުއިޢްޒުގެ ވަޢުދުފުޅުތަކުގެ ތެރޭގައި ހިމެނޭ، ސަރުކާރުން ވަރަށް ބޮޑު އަހަމިއްޔަތެއް ދޭ ސިޔާސަތެކެވެ.
މި ސިޔާސަތު ތަންފީޒުކުރުމަށް، ހަޔަ އެޑިޔުކޭޝަން މިނިސްޓްރީން އަންނަނީ މީރީ ޕްރޮޖެކްޓާއި މޯލްޑިވިސް ނެޝަނަލް ސްކިލްސް ޑިވެލޮޕްމަންޓް (އެމްއެންއެސްޑީއޭ) މެދުވެރިކޮށް، "ފިއުޗަރ-ރެޑީ ޔޫތް" ޕްރޮގްރާމް ފަދަ ޒުވާނުން ބިނާކުރުމަށް އަމާޒުކޮށް އެތައް މަސައްކަތްތަކެއް ކުރަމުންނެވެ.