ގެދޮރު އިމާރާތްކުރުމަށް މާލީ ގޮތުން ދަތިތަކާ ކުރިމަތިވާ ފަރާތްތަކަށް ހާއްސަކޮށްގެން ތައާރަފުކުރި "ހިޔާވަހި ފައިނޭންސް ސްކީމް" އަށް ކުރިމަތިލާން ހައުސިން މިނިސްޓްރީން ހުޅުވާލައިފިު އެވެ.
އެ މިނިސްޓްރީން ބުނީ މިކަމަށް ހުޅުވައިލީ މިއަދުން ފެށިގެން އަންނަ އަހަރުގެ އެޕްރީލް މަހުގެ 8 އާ ހަމައަށް ކަމަށެވެ. "ހިޔާވަހި" ސްކީމުން އެހީ ބޭނުންވާ ފަރާތްތަކުން އެދެން ޖެހެނީ މި www.hiyaavehi.housing.gov.mv ޕޯޓަލް މެދުވެރިކޮށެވެ.
ހައުސިން މިނިސްޓްރީން ނިންމާފައި ވަނީ ސްކީމްގެ ދަށުން ތިން ކެޓަގަރީއަކުން މާލީ އެހީ ދިނުމަށެވެ. އެއީ ރަށްވެހި، ސަހަރު އަދި ފަހިމާލެ އެވެ.
އެ ސްކީމްގެ ތެރެއިން ލޯނު ދޭނީ އިސްލާމީ ސްކޫލާ އެއްގޮތަށް 5 ޕެސެންޓުގެ އިންޓްރެސްޓް ރޭޓެއްގަ އެވެ. އަދި ލޯނު އަނބުރާ ދެއްކުމަށް 25 އަހަރު ލިބޭނެ އެވެ. ސްކީމްގެ ތެރެއިން ލޯނު ދޫކުރެވޭނީ ކޮންމެ ފަރާތެއްގެ ވެސް ފުރަތަމަ ގެ އިމާރާތް ކުރުމަށަވެ. "ހިޔާވެހި" ފައިނޭންސިންގެ ތެރެއިން މުޅިން އަލަށް ގެއެއް އިމާރާތް ކުރަން އަދި އިމާރާތްކުރަން ފަށާފައި ހުރި ގެއެއް ނިންމަން ވެސް ލޯނު ލިބޭނެ އެވެ.
ސްކީމުން ވަނީ ރަށްވެހި ކެޓަގަރީން އެދި ހުށަހަޅުއްވާ ފަރާތްތަކަށް އެއް މިލިއަން ރުފިޔާ ސަހަރުތަކުން ހުށަހަޅާ ފަރާތްތަކަށް 3 މިލިއަން ރުފިޔާ އަދި ފުރަމާލެއިން އެދި ހުށަހަޅުއްވާ ފަރާތްތަކަށް 6 މިލިއަން ރުފިޔާއާ ހަމައަށް ފައިސާ ލިބޭނެ އެވެ.
"ހިޔާވަހި" ފައިނޭންސިން ސްކީމްގެ ޕާޓްނަރުންނަކީ ބޭންކް އޯފް މޯލްޑިވްސް (ބީއެމްއެލް) އާއި މޯލްޑިވްސް އިސްލާމިކް ބޭންކް (އެމްއައިބީ) ގެ އިތުރުން ހައުސިން ޑިވެލޮޕްމެންޓް ފައިނޭންސް ކޯޕަރޭޝަން (އެޗްޑީއެފްސީ) އެވެ.