ޓީޗަރުންނަށް ވާން ބޭނުންވާ ދަރިވަރުންގެ އަދަދު އިންތިހާއަށް އިތުރުވަމުން އަންނަ ކަމަށް އެޑިއުކޭޝަން މިނިސްޓަރު ޑރ. އިސްމާޢީލް ޝަފީއު ވިދާޅުވެއްޖެ އެވެ.
ރާއްޖޭގެ ތައުލީމީ ދާއިރާ އަށް ދޭސީ ޓީޗަރުންގެ ދަތިކަން ކުރިމަތިވެފައިވާތީ ޓީޗަރުން ބިނާކުރަން ކުރިއަށް ގެންދަން ނިންމި ގައުމީ ޕްރޮފްރާމް ފެށުމުގެ ރަސްމިއްޔާތުގައި މިނިސްޓަރު އިއްޔެ ވިދާޅުވީ ޓީޗަރުންނަށް ވާން ބޭނުންވާ ދަރިވަރުން އިތުރުވަމުން ދިއުމަކީ ތައުމީލީ ދާއިރާ އަށް އޮތް ވަރަށް ބޮޑު ހިތްހަމަޖެހުމެއް ކަމަށެވެ.
ޓީޗަރުން ބިނާކުރުމުގެ ގައުމީ މަޝްރޫއަކީ އޭ ލެވެލް އަށް ކިޔަވާ ދަރިވަރުންނަށް އެ ދާއިރާ އިން ކުރިއަށް ގެންދެވޭ ގޮތަށް ފަރުމާކޮށް، އެފަދަ ދަރިވަރުންނަށް މައުލޫމާތު ވެސް ފޯރުކޮށް ދީގެން ފެށި ޕްރޮގްރާމެކެވެ.
އެގޮތުން ޔުނިސެފްގެ އެހީތެރިކަމާއި، ޖީޕީއީގެ ފަންޑިންގެ އެހީގައި ފެށީ ޕްރޮގްރާމްގެ ފުރަތަމަ ބުރުގައި 135 ދަރިވަރަކު ހިމެނެ އެވެ. މިނިސްޓަރު ވިފާޅުވީ އުންމީދަކީ އަންނަ އަހަރު ހުޅުވާލެވޭ ފުރުޞަތުގައި މަދުވެގެން 150 ވަރަކަށް ދަރިވަރުން ބައިވެރިވުން ކަމަށެވެ.
މިނިސްޓަރު ވިދާޅުވީ ކިޔައިވައި ވަރަށް މާތް އަދި މުހިންމު މަސައްކަތެެއް ކަމަށެވެ. އެހެންވެ ޓީޗަރުންގެ އަގު ވަޒަންކުރެވި، އެ މީހުންނަކީ މުޖުތަމަޢުގެ ތެރޭގައި ގަދަރުވެރި، އަބުރުވެރި އަދި ޝަރަފުވެރި ބަޔަކަށް ހެދުމަކީ މި ސަރުކާރުގެ ވަރަށް ބޮޑު އަމާޒެއް ކަމަށް ވިދާޅުވި އެވެ.