ގޭންގު ކުށްތަކަށް ދާއިމީ ނިމުމެއް ގެންނަން ގާނޫނުތައް އިސްލާހުކޮށް އެންމެ ހަރުކަށި ފިޔަވަޅު އަޅާނެކަމުގެ ކަމަށް ހޯމްލޭންޑު މިނިސްޓަރު އަލީ އިހުސާން ވިދާޅުވެއްޖެ އެވެ.
ހުޅުމާލޭގެ ފޭސް ދޭއްގެ ހިޔާ 9 ވަނަ ޓަވަރުގެ އެޕާޓްމެންޓެއްގައި ރަހީނުކޮށްގެން ގެންގުނު ދިވެއްސަކު ސަލާމަތްކޮށް ރޭ 12 މީހަކު ހައްޔަރުކުރުމަށް ފަހު،ބައެެއް މީޑިއާތަކަށް މިނިސްޓަރު ވިދާޅުވީ ރައްޔިތުންގެ ސަލާމަތާއި ރައްކާތެރި ކަމަކީ ސަރުކާރަށް ވަރަށް މުހިއްމު ކަމެއް ކަމަށެވެ.
"ކުށްކުރާ ފަރާތްތަކާ ދޭތެރޭގައި ގާނޫނުގެ ތެރެއިން އެޅެން އޮތް އެންމެ ހަރުކަށި ފިޔަވަޅު އަޅާނަން." އިހުސާން ވިދާޅުވި އެވެ.
އޭނަ ވިދާޅުވީ ހިޔާގެ ބައެއް ތަންތަން ކުއްޔަށް ހިފައިގެން ތަކުރާރުކޮށް ކުށްކުރާކަން ފާހަގަ ކުރެވޭނެ ނަމަ ގާނޫނުގެ ތެރެއިން އެ ތަންތަން ދައުލަތަށް ނެގޭ ކަމަށެވެ. އަދި ހިޔާ ޓަވަރުތަކުގައި ހުރި އެފަދަ ތަންތަނުގެ ވެރިންނާ ވާހަކަ ދައްކާނެ ކަމަށް ވެސް މިނިސްޓަރު ވިދާޅުވި އެވެ.
އިހުސާން ވިދާޅުވި ގޮތުގައި ގޭންގު ކުށްތައް އިތުރުވެގެން ދިޔައީ ގާނޫނުތަކުގައި ދޯހަޅި ބައެއް ކަންތައްތަކާ ހުރެ އެެވެ.
"ރާއްޖޭގައި ގާނޫނުތައް ހެދިގެން އައިއިރުގައި ކުށްކުރާ ފަރާތަށް ރައްކާތެރިކަން ހޯދަ ދިނުމަށްޓަކައި ކުށްކުރާ ފަރާތް ސަލާމަތްކުރުމަށްޓަކައި ހެދެން އޮތް ހުރިހާ ގާނޫނެއް ހަދައިގެން އަޅުގަނޑުމެން މިތިބީ، އަޅުގަނޑުމެންނާ ހިސާބަށް އައިއިރު." އޭނާ ވިދާޅުވި އެވެ.
އެގޮތުން ކުށުގެ މާހައުލުން މީހުން ދުރުކުރުމަށްޓަކައި ކުށަށް ނުދާނެ ގޮތަކަށް ގާނޫނު ބައްޓަން ކުރުމުގެ އެހާ ބޮޑު ވިސްނުން އޮތްކަން ކުރިން ފެންނަން ނެތް ކަމަށާއި ހަރުކަށި ފިޔަވަޅު އެޅޭ ގޮތަށް ގާނޫނުތައް އިސްލާހު ކުރަން ނިންމީ އެ ސަބަބާ ހުރެ ކަމަށް ވިދާޅުވި އެވެ.
"އަޅުގަނޑުމެން ފުރަތަމަ ވެސް މި ބަލަން، ދެކެން ބޭނުންވާ ދުވަހަކީ މި ހުށަހަޅާ ގާނޫނު ވުޖޫދަށް އައިސް އަމަލީ ސިފަ ގެންނަން އަޅުގަނޑުމެން ބޭނުންވާ ދުވަސް،" އިހުސާން ވިދާޅުވި އެވެ. "އެއީ އަޅުގަނޑު ދަންނަވާނީ މިހާރު މި އުފެދިފައި އޮތް ކުށުގެ މާހައުލު ހައްލު ކުރުމަށް އެޅޭނެ އެންމެ ބޮޑު ފިޔަވަޅު. "މިކަމަށް ހައްލެއް ލިބޭނެ އަޅުގަނޑުމެން މި ގާނޫނުތަކަށް ގެންނަ ބަދަލުން."
މިނިސްޓަރު ވިދާޅުވި ގޮތުގައި މިހާރު ވެސް ކުށުގެ މާހައުލު އޮތް މިންވަރުން ފުލުހުންނަށް ކަންކަން ކުރެވޭނެ ވަރަށް ގާނޫނުގެ ތެރެއިން ލިބެން ޖެހޭ ބާރާއި ހަތިޔާރު ހުރި ކަމަށެވެ. ނަމަވެސް ބައެއް ގާނޫނުތައް ހުރި ގޮތުން ވަރަށް ފަސޭހަ ކަމާއެކު ކުށްކުރާ މީހުން ދޫވެގެންދޭ ކަމަށް ވިދާޅުވި އެވެ.
"އެހެން ނަމަވެސް އަޅުގަނޑަށް ހީވަނީ އަޅުގަނޑުމެންގެ ގައުމުގައި ތަންކޮޅެއް ފުޅާވެފަހެން މިއޮތީ. އެ ވީވީނުން ގޮސް ތަކުރާރުކޮށް އެންމެންގެ ލޯމަތީގައި ކުށްކުރާ މީހާ ވެސް ކުޑަކުޑަ އިދާރީ ކުށެކޭ ކިޔާފައި ނުވަތަ ނަގަންޖެހޭ ދިމާލަކުން ނުނެގުމުގެ ފިޔަވަޅެކޭ ކިޔާފައި އެމީހާ ކުށްނުކުރާ ކަމަށް ހަދާފައި އެ މީހާ މުޖުތަމައުގެ ތެރެއަށް އެބަ ދޫވޭ." އިހުސާން ވިދާޅުވި އެވެ.