އިންޑިއާގެ ފިލްމީ ތަރިން ކަމަށްވާ އަލީ ފަޒަލް އާއި އަންހެނުން ރިޗާ ޗައްޑާގެ ދަރިފުޅުގެ ނަމަކީ ޒުނޭރާ އިދާ ފަޒަލް ކަމަށް ބުނެފި އެވެ.
ދަރިފުޅުގެ ވަނަމަކަށް ދެމަފިރިން ކިޔައި އުޅެނީ ޒޫނީ އެވެ.
އަލީ އާއި ރިޗާގެ ފުރަތަމަ ދަރިފުޅު ޒުނޭރާ އުފަންވީ މި އަހަރުގެ ޖުލައި މަހުގެ ތެރޭގަ އެވެ. އެކީގައި 2013 ގެ ފިލްމު "ފުކްރޭ" ކުޅުނު ދެ ތަރިން ކައިވެނިކުރީ 2022 ގަ އެވެ. ރިޗާ ބުނެފައިވާ ގޮތުގައި އޭނަ އަށް އަލީ ޕްރޮޕޯސްކުރީ 2018 ގެ ތެރޭގައި ރާއްޖެ އަށް ކުރި ޗުއްޓީ ދަތުރެއްގެ ތެރޭގަ އެވެ.
"މަސާން" އާއި "ގޭންގްސް އޮފް ވަސޭޕޫރް" އަދި "ސަރަބްޖީތު" ފަދަ މަގުބޫލު ފިލްމުތައް ކުޅުނު ރިޗާ އެންމެ ފަހުން ފެނިފައި މި އަހަރުގެ މެއި މަހު ޑައިރެކްޓަރު ސަންޖޭ ލީލާ ބަންސާލީ ނެޓްފްލިކްސް އަށް ގެނައި ސީރީޒް "ހީރާމަންޑީ: ދަ ޑައިމަންޑް ބާޒާރު" އިންނެވެ.
އަލީ އަކީ ބޮލީވުޑްގެ އިތުރުން އިންޓަނޭޝަނަލް ޕްރޮޖެކްޓްތަކުގައި ވެސް މަސައްކަތްކުރާ އެކްޓަރެކެވެ.