އިޒްރޭލުން ފަލަސްތީނުގެ ގާޒާގައި ހިންގަމުންދާ ގަތުލްއާންމުގައި މަރުވި މީހުންގެ 70 ޕަސެންޓަކީ އަންހެނުންނާއި ކުޑަކުދިން ކަމަށް އދ. ގެ އިންސާނީ ހައްގުތަކާބެހޭ އޮފީހުން (އޯއެޗްސީއެޗްއާރު) ބުނެފި އެވެ.
އޯއެޗްސީއެޗްއާރުން އިއްޔެ ނެރުނު ރިޕޯޓެއްގައި ބުނެފައިވާ ގޮތުން އިޒްރޭލުން ހިންގަމުންދާ ގަތުލްއާންމުގައި ފުރަތަމަ ހަ މަސްދުވަހުގެ ތެރޭގައި މަރުވެފައިވާ 34500 މީހުންގެ ތެރެއިން 8119 މަރު ވަނީ ކަށަވަރުކުރެވިފަ އެވެ. އޭގެ ތެރެއިން 44 ޕަސެންޓް މީހުންނަކީ ކުޑަކުދިން ކަމަށްވާއިރު 26 ޕަސެންޓަކީ އަންހެނުންނެވެ.
މަރުވި މީހުންގެ ތެރެއިން އެންމެ ހަގު އުމުރުގެ ކުއްޖަކީ އުމުރުން އެއް ދުވަސްވީ ކުއްޖެއް ކަމަށާއި އަދި މަރުވި އެންމެ އުމުރުން ދުވަސްވީ އަންހެން މީހާ އަކީ 97 އަހަރުގެ އަންހެނެއް ކަމަށް ރިޕޯޓުގައި ބުނެފައިވެ އެވެ.
ރިޕޯޓުގައިވާ ގޮތުން 88 ޕަސެންޓް ހާލަތްތަކުގައި، އެއް ހަމަލާއެއްގައި ފަހެއް ނުވަތަ އެއަށްވުރެ ގިނަ މީހުން މަރުވެފައިވެ އެވެ. އަދި މަރުވި 80 ޕަސެންޓް މީހުންނަކީ އިމާރާތްތަކުގައި ދިރިއުޅެމުންދިޔަ މީހުން ކަމަށްވެސް ބުނެފައިވެ އެވެ.
މިދިޔަ އަހަރު އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ހިންގަމުންދާ ގަތުލްއާންމުގައި ގާޒާ އިން މިހާތަނަށް ވަނީ 43،000 އަށް ވުރެ ގިނަ މީހުން މަރުވެފަ އެވެ. އިޒްރޭލުގެ ހަމަލާތަކުގެ ސަބަބުން ގާޒާގެ 85 ޕަސެންޓު މީހުން ގެދޮރު ދޫކޮށް ވަނީ ގޮސްފަ އެވެ. އަދި ގާޒާގެ ބައި މިލިއަނެއްހާ މީހުން ބަޑުހައިހޫނުކަން އަންނަނީ ތަހައްމަލު ކުރަމުންނެވެ.