ލޮނު ފެނުން މަސް ފިނި ކުރާ ނިޒާމު ގާއިމު ކުރަން 13 މީހަކަށް އެހީގެ ލިޔުން ހަވާލުކޮށްފި އެވެ.
ލިޔުން ހަވާލުކުރީ މިދިޔަ ބުރާސްފަތި ދުވަހު ރައީސް އޮފީހުގައި ފިޝަރީޒް މިނިސްޓްރީން ބޭއްވި ރަސްމިއްޔާތެއްގަ އެވެ.
މިދިޔަ ސެޕްޓެމްބަރު 22، ގައި އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން އެސްޑީއެފްސީ) އާ ގުޅިގެން ހުޅުވާލި އެ ފުރުސަތުގައި ކުރިމަތިލި މީހުންގެ ތެރެއިން ލޯނު ހަމަޖެހުނު މީހުންނަށް އެވޯޑް ލެޓާ ހަވާލުކޮށް ދެއްވީ ރައީސް ޑރ. މުހައްމަދު މުއިއްޒެވެ.
އެ ފެސިލިޓީގެ ދަށުން ނަގާ ތެކެތީގެ އަގުގެ 35 ޕަސަންޓު ސަރުކާރުން ދައްކައި، ރަހުނަކާ ނުލައި 100،000ރ. ފެށިގެން ދެ 2،000،000ރ. ހަމައަށް އާރްއެސްޑަބްލިއު ސިސްޓަމަކާ ޖަނޭޓަރަކާ އަދި ސޯލާ ޕެނަލް ގަތުމަށް ފައިސާ ލިބެ އެވެ. އަދި އެސްޑީއެފްސީގައި ރަޖިސްޓްރީކޮށްފައިވާ ވެންޑަރެއް މެދުވެރިކޮށް އޮޑިވެރިން އަމިއްލައަށް ތަކެތި ގަތުމުގެ އިހުތިޔާރު ފަހިކޮށް ދީފައިވެ އެވެ.
މިއީ އިސްލާމީ ޝަރީޢާ ހަމަތަކުގެ މަތިން ތަކެތި ގަތް އަގާއި އަގަށް ފައިދާގެ ގޮތުގައި ލާ މިންވަރު ކަނޑައަޅައިގެން ކުރިޔަށް ގެންދާ ސްކީމެކެވެ. ފިޝަރީޒް މިނިސްޓްރީން ބުނެފައި ވަނީ އާރްއެސްޑަބްލިޔު ސިސްޓަމް ފެސިލިޓީ އަށް ހަ މަސްދުވަހުގެ ގްރޭސް ޕީރިއަޑެއް ލިބޭނެ ކަމަށެވެ.
އިސްލާމިކް ޑިވެލޮޕްމަންޓް ބޭންކް (އައިޑީބީ) ގެ "ސަޕޯޓް ޕީޕަލްސް ލައިވްލިހޫޑް އިން ފިޝަރީޒް ސެކްޓާ އިން މޯލްޑިވްސް ތުރޫ ސަސްޓެއިނަބަލް އެނާޖީ މަޝްރޫއު" ގެ ދަށުން މަދުވެގެން 100އެއްހާ ދޯންޏަށް އެހީ ފޯރުކޮށް ދެވޭނެ ކަމަށެވެ.