ހޮލީވުޑްގެ ކުޅަދާނަ ޑައިރެކްޓަރު ކްރިސްޓޮފާ ނޯލަންގެ އާ ފިލްމުގެ ކާސްޓާ އިތުރު ތަރިންތަކެއް ގުޅިފައިވާ ރިޕޯޓްތައް ބުނެފި އެވެ.
މީޑިއާތަކުން މިދިޔަ މަހު ރިޕޯޓްކުރި ގޮތުގައި ނަން އަދި ސާފުނުވާ ފިލްމުގެ ކާސްޓަށް އެންމެ ފުރަތަމަ ނެގި ތަރި އަކީ ތަޖުރިބާކާރު އެކްޓަރު މެޓް ޑޭމަން އެވެ. ރިޕޯޓްތައް މިހާރު ބުނާ ގޮތުން ފިލްމުގެ ކާސްޓަށް އިތުރުވި ތަރިންނަކީ ޒުވާން ދެ ތަރިން ކަމަށްވާ ޓޮމް ހޮލަންޑާއި ޒެންޑާޔާގެ އިތުރުން ކުޅަދާނަ ބަތަލާ އޭން ހެތަވޭ އެވެ.
ފާހަގަކޮށްލަން ޖެހޭ ކަމަކީ ކުރިން ވެސް އެކީގައި މަސައްކަތްކޮށްފައިވާ ހޮލަންޑާއި ޒެންޑާޔާ އަކީ ދެ ލޯބިވެރިންކަމެވެ.
މި ކާސްޓުންނާ އެކީ ނޯލަންގެ އުންމީދީ އާ ފިލްމު ބެލުންތެރިންނަށް ގެނެސްދޭން އަމާޒު ހިފާފައި އޮތީ ޖުލައި 17، 2026 އެވެ. އަދި މި ފިލްމު ވާނީ ފާއިތުވި 20 އަހަރުގެ ތެރޭގައި ވޯނާ ބްރޮސްއާ ނުގުޅި ނޯލަން ހަދާ ފުރަތަމަ ފިލްމަށެވެ. އިނގިރޭސިވިލާތަށް އުފަން ޑައިރެކްޓަރުގެ އާ ފިލްމު ޕްރޮޑިއުސް ކުރަނީ އޭނަ އާއި އަންހެނުން އެމާ ތޯމަސްގެ ޕްރޮޑަކްޝަން ހައުސް، ސިންކޮޕީންނެވެ.
ނޯލަންގެ އެންމެ ފަހުގެ ފިލްމަކީ މިދިޔަ އަހަރުގެ "އޯޕަންހީމާ" އެވެ. އެ ފިލްމަކީ 7 އޮސްކާ އެވޯޑްގެ އިތުރުން ފަސް ގޯލްޑެން ގްލޯބް އެވޯޑް ހޯދި ވަރަށް ކާމިޔާބު ފިލްމެކެވެ. ޖުމްލަ 100 މިލިއަން ޑޮލަރުގެ ބަޖެޓަކުން ހެދި ފިލްމަށް ބޮކްސް އޮފީހުގައި 977 މިލިއަން ޑޮލަރުގެ އާމްދަނީއެއް ލިބުނެވެ.
ނޯލަން، 54، ގެނެސްދިން ފިލްމުތަކުގެ ތެރޭގައި "ޓެނެޓް"، "ޑަންކާކް"، "އިންސެޕްޝަން"، "އިންސޮމްނިއާ" އަދި "މެމެންޓޯ" ހިމެނެ އެވެ.