ތަކުރާރުކޮށް ރާއްޖެ އަށް މަސްތުވާތަކެތި އެތެރެ އަށް އައްޑު އަށް ނިސްބަތްވާ ދުވަސްވީ މީހާ އަށް ދައުވާ ކުރަން ޕްރޮސިކުއުޓާ ޖެނެރަލްގެ އޮފީހަށް ފޮނުވައިފި އެވެ.
ސެޕްޓެމްބަރު މަހާއި އޮކްޓޯބަރު މަހުގެ ތެރޭގައި ވައިގެ މަގުން ރާއްޖެ އަށް މަސްތުވާތަކެތި އެތެރިކުރި މައްސަލައިގައި ހައްޔަރުކޮށްފައި ވަނީ ހިތަދޫ ވެހެތާނުގޭ އަބްދުﷲ ސާދިގް، 65، އެވެ.
އޭނަ އެންމެ ފުރަތަމަ ހައްޔަރުކުރީ ރާއްޖެ އިން ބޭރުން އައި އިރު، މަސްތުވާތަކެތި ގެނައި މައްސަލައެއްގައި ސެޕްޓެމްބަރު މަހުގެ 16 ގަ އެވެ. އެ ފަހަރު ސާދިގުގެ އަތުން 3.49 ގްރާމްގެ ހެރޮއިން ފެނިފައިވެ އެވެ.
އޭގެ ފަހުން އޮކްޓޯބަރު ފަހުކޮޅު އަނެއްކާ ވެސް އޭނަ ހައްޔަރުކުރީ ބޭރުގައި ހުރެފައި އައި އިރު ލަގެޖްގެ ގޮތުގައި ގެންގުޅުނު ފޮށި ބަލައި ފާސްކުރިއިރު އޭގެ ތެރޭގައި މާ ޖަހާފައި ހުރި ތިން ވާސްއެއްގެ ތެރެއިން މަސްތުވާތަކެތި ކަމަށް ޝައްކުކުރެވޭ 4 ރަބަރު ޕެކެޓް ފެނިގެންނެވެ. އަދި އެ ތަކެތީގެ ވަގުތީ ޓެސްޓުން ހެރޮއިން އަށް ޕޮޒިޓިވްވެފައިވާ އިރު، ބަރުދަނުގައި 270 ގްރާމް ހުރި ކަމަށް ކަސްޓަމްސް އިން އޭރު ބުނެފައިވެ އެވެ.