މިދިޔަ ސެޕްޓެމްބަރު މަހު ރިލީޒްކުރި އިންޑިއާގެ ފިލްމު "ދޭވްރާ: ޕާޓް 1" ނެޓްފްލިކްސް އަށް ދޫކޮށްލައިފި އެެވެ.
މިހާރު އެ ފިލްމު ސްޓްރީމްކުރަނީ ތެލެގޫ، ތަމަޅަ، މަލަޔާޅަމް ބަހުން ކަމަށް ވިޔަސް ވަރަށް އަވަހަށް ހިންދީ ވާޝަން ވެސް ނެޓްފްލިކްސް އިން ގެނެސްދޭނެ އެވެ. "ދޭވްރާ" ގެ ހިންދީ ވާޝަން، އުތުރު އިންޑިއާގެ އޯޑިއަންސަށް ގެނެސްދިނުމުގެ ޒިންމާ ނެގީ ކަރަން ޖޯގަރްގެ ދަރުމާ ޕްރޮޑަކްޝަނުންނެވެ.
މި ފިލްމަކީ މަޝްހޫރު ތެލެގޫ އެކްޓަރު އެންޓީއާރް ޖޫނިއާއާ އެކީ ބޮލީވުޑްގެ ބަތަލާ ޖާންވީ ކަޕޫރް ކުޅުނު އެކްޝަން ޑްރާމާއެކެވެ. ކޮރަޓަލާ ސިވާ ޑައިރެކްޓްކުރި "ދޭވްރާ" ގެ ކާސްޓްގައި ސައިފް އަލީ ޚާނާއި ޒަރީނާ ވައްހާބް ވެސް ހިމެނެ އެވެ.
މި ފިލްމަކީ 2022 ގެ "އާރްއާރްއާރް" އަށް ފަހު ދެކުނުގެ ކާމިޔާބު އެކްޓަރު އެންޓީއާރް ކުޅުނު ފުރަތަމަ ފިލްމެވެ. އޭނަ އަންނަ އަހަރު ހިންދީ ފިލްމަކުން ވެސް ފެނިގެން ދާނެ އެވެ. އެއީ ރިތިކް ރޯޝަނާއި ކިއާރާ އަދުވާނީ "ވޯ 2" އިންނެވެ.