ވިނީޝަސް ޖޫނިއާގެ ހެޓްރިކުން ސްޕެނިޝް ލީގުގައި މިރޭ ރެއާލް މެޑްރިޑުން 4-0 އިން އޮސަސޫނާ ބަލިކޮށްފި އެވެ.
މި މޮޅާއެކު 12 މެޗުން ލިބުނު 27 ޕޮއިންޓާ އެކު ރެއާލް އޮތީ ލީގުގެ ދެވަނައިގަ އެވެ. އެއްވަނައިގައި 33 ޕޮއިންޓާ އެކު އޮތީ ބާސެލޯނާ އެވެ.
އަމިއްލަ ދަނޑުގައި ކުޅުނު މި މެޗުގެ 34 ވަނަ މިނެޓްގައި ވިނީޝަސް ވަނީ ރެއާލަށް ލީޑު ނަގައިދީފަ އެވެ. މިއީ އޮސަސޫނާގެ އޭރިއާގެ ތެރެއަށް ވަދެ ފޮނުވާލި ހަމަލާއެއް ގޯލު މަތީ ކަނަށް އަމާޒުކޮށްލައިގެން ކާމިޔާބުކުރި ގޯލެކެވެ. އަދި ފުރަތަމަ ހާފް ނިމުމުގެ ކުރިން ޖޫޑް ބެލިންހަމް ވަނީ ރެއާލްގެ ދެވަނަ ގޯލު ކާމިޔާބުކޮށްދީފަ އެވެ.
ރެއާލުން އުފެއްދި ކައުންޓަ އެޓޭކެއްގައި މެޗުގެ 61 ވަނަ މިނެޓްގައި ވިނީޝަސްގެ ރެއާލްގެ ތިންވަނަ ގޯލު ކާމިޔާބުކުރީ އޮސަސޫނާގެ ކީޕަރު ކައިރިން ނައްޓާލުމަށްފަހު ބޯޅަ ގޯލަށް ވައްދާލައިގެންނެވެ. އަދި އޭގެ 8 މިނެޓް ފަހުން ބްރަހިމް ޑިއާޒް ތަނަވަސްކޮށްދިން ފުރުސަތަކުން ރެއާލްގެ ހަތަރުވަނަ ގޯލު ކާމިޔާބުކޮށްދީ ވިނީޝަސް ވަނީ އޭނާގެ ހެޓްރިކް ފުރިހަމަކޮށްފަ އެވެ.
ރެއާލުން ފަސޭހަ މޮޅެއް ހޯދިއިރު، އެޓީމަށް މި މެޗުގައި ކުރިމަތިވި ހަމައެކަނި ނުތަނަވަސްކަމަކީ އެޓީމުގެ ޑިފެންޑަރު އެޑާ މިލިޓާއޯ އަށް ސީރިއަސް އަނިޔާއެއް ލިބުމެވެ. މިލިޓާއޯ އަށް ލިބުނު ސީރިއަސް އަނިޔާގެ ސަބަބުން އޭނާ ދަނޑުން ބޭލީ ވެސް އަށިގަނޑުގަ އެވެ.
އަނިޔާގެ ގިނަ މައްސަލަތަކެއް ރެއާލަށް މި ސީޒަނުގައި ވަނީ ކުރިމަތިވެފަ އެވެ. އެގޮތުން މިދިޔަ މަހުގެ ތެރޭގައި ޑިފެންޑަރު ޑެނީ ކާވަހާލަށް ސީރިއަސް އަނިޔާއެއް ވެފައިވާއިރު، ޑޭވިޑް އަލަބާގެ ކަކުލަށް ލިބުނު އަނިޔާއަކާ ގުޅިގެން އޭނާ އަދިވެސް ހުރީ ކުޅުމާ ދުރުގަ އެވެ.