ހުއްޓުމެއް ނެތި ރައީސް ޑރ. މުހައްމަދު މުއިއްޒު ހައްދަވަނީ ހުސް ދޮގު ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
ފައްޔާޒު މިހެން ވިދާޅުވެފައިމިވަނީ އާބަން ސެންޓަރުތަކާ ގުޅޭގޮތުން ހަގީގަތާ ހިލާފު ވާހަކަ ދައްކަނީ ސިޔާސީ ފައިދާއެއް ހޯދުމަށް ކަމަށް ރައީސް މުއިއްޒު ވިދާޅުވުމާ ގުޅިގެންނެވެ.
ރައީސްގެ ވާހަކަފުޅުތަކަށް ރައްދު ދެއްވަމުން ފައްޔާޒު ވިދާޅުވީ އެތައް ޖަލްސާއެއްގައި ވިދާޅުވެ މެނިފެސްޓޯގައި ވަރަށް ސާފުކޮށް ބަޔާންކުރިޔަސް ވެރިކަމަށް ވަޑައިގެން ވަރަށް ގިނަ ކަންކަން ރައީސް މުއިއްޒު ކުރައްވަމުން ގެންދަވަނީ ސީދާ ވިދާޅުވި ގޮތާ އިދިކޮޅަށް، ލިޔެފައިވާ ގޮތާ ހިލާފަށް ކަމަށެވެ.
ސަރުކާރުން މިއަދު ހަތް ރަށެއް އާބަން ސެންޓަރުގެ ގޮތުގައި ތަރައްގީ ކުރަން އިއުލާނު ކުރީ އެއްވެސް މަޝްވަރާ ކުރުމެއް ނެތި، ރައްޔިތުންގެ ހިޔާލު ހޯދުމެއް ނެތި ކަމަށް ފައްޔާޒު ވިދާޅުވި އެވެ. އަދި ގައުމީ ތަރައްގީގެ 20 އަހަރުގެ މާސްޓާޕްލޭން ވެސް އެކުލަވާލާނީ އެގޮތަށް ކަމަށާއި އެ ޕްލޭނާ އެއްގޮތަށް ކަންކަން ވެސް ނުކުރައްވާނެކަން ދިވެހި ރައްޔިތުންނަށް މިއަދު ޔަގީންވާ ކަމަށް ފައްޔާޒު ވިދާޅުވި އެވެ.
"ހުއްޓުމެއް ނެތި ހައްދަވަނީ ހުސް ދޮގު،" ފައްޔާޒު ވިދާޅުވި އެވެ.
އާބަން ސެންޓަރުތަކުގެ ގޮތުގައި ތަރައްގީކުރާނެ 7 ރަށް މިއަދު ކަނޑައަޅާފައިވާއިރު، އެ 7 ރަށަކީ ރ. އުނގޫފާރު، ބ. އޭދަފުށި، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ އަދި ލ. ފޮނަދު އެވެ.
ރައީސް މުއިއްޒުގެ މެނިފެސްޓޯގައިވާ ގޮތުން ހއ. އަތޮޅާއި، ހދ. އަތޮޅު އަދި ށ. އަތޮޅު ހިމެނޭ އުތުރުގެ ތަރައްގީގެ ޒޯނުގައި، މައި ހަބަކީ ހދ. ކުޅުދުއްފުއްޓެވެ. އަދި ގއ. އަތޮޅާއި ގދ. އަތޮޅާއި ފުވައްމުލަކު ސިޓީ އަދި އައްޑޫ ހިމެނޭ ދެކުނުގެ ތަރައްގީގެ ޒޯނުގައި، މައި ހަބަކީ އައްޑު އެވެ.