ކ. ހިންމަފުށީ ގެއެއްގެ ދޮރަށް ވަޒަނެއް އެރުމާއި ގުޅިގެން ، ހަނގުރާމަވެރި ހަތިޔާރު ގެންގުޅުމުގެ ކުށް ސާބިތުވާކަމަށް ކްރިމިނަލް ކޯޓުން ކުރި 11 އަހަރުގެ ޖަލު ހުކުމް ހިންމަފުށީ އައްސޭރި ޖަލުގައި ތަންފީޒުކުރަމުން ގެންދާ ކުރީގެ ޑިފެންސް މިނިސްޓަރ ކާނަލް ނާޒިމްގެ ސަލާމަތާއި ރައްކާތެރިކަމާއި މެދު އާއިލާއިން ކަންބޮޑުވުން ފާޅުކޮށްފިއެވެ.
'އައްޑޫލައިވް' އާއި ވާހަކަދައްކަމުން ކާނަލް ނާޒިމްގެ އާއިލާގެ ގާތްބޭފުޅަކު ވިދާޅުވިގޮތުގައި، މިއަދު ހިންމަފުށީ ގެއެއްގެ ދޮރަށް ވަޒަނެއް އެރި ޚަބަރު ނޫސްތަކުން ފެނުމާއި އެކު ނާޒިމްގެ އާއިލާގެ ބޭފުޅުން ތިއްބެވީ ވަރަށް ބޮޑު ނުތަނަވަސް ކަމެއްގެ ތެރޭގައި ކަމަށެވެ.
" އަޅުގަނޑުމެންނަށް ކޮންމެ ވެސް ވަރަކަށް އިންޒާރު ލިބިފައި އެބަވޭ ޖަލު ތެރެއިން ނާޒިމަށް ހަމަލާ ދޭނެ ކަމަށް. އެކަން އަޅުގަނޑުމެން ވާނީ ކަރެކްޝަނަލް ސާވިސްގެ ސަމާލުކަމަށް ގެނެސްފައި. ދެން އަނެއްކާ މިއަދު ހިންމަފުށީ ގެއެއްގެ ދޮރަށް ވަޒަނެއް މި އެރީ. " ނާޒިމްގެ އާއިލާގެ ފަރާތުން ވާހަކަދެއްކި ގާތް ބޭފުޅަކު ބުންޏެވެ.
ކ.ހިންމަފުށީ ކައުންސިލްގެ ރައީސް އާއި ހަވާލާދީ ބައެއް މީޑިޔާތަކުގައި ރިޕޯޓްކޮށްފައިވާގޮތުގައި ހިންމަފުށީ ކައިރީގައި އޮންނަ ގިލި ލަންކަންފުށި ރިސޯޓުގައި މަސައްކަތް ކުރާ ބިދޭސީ މުވައްޒަފަކު ކުއްޔަށް ހިފައިގެން އުޅޭ ގެއެއްގެ ދޮރަށް ވަޒަން އެރި ގަޑީގައި ބަޑި ޖަހާ އަޑު ވެސް އިވުނު ކަމަށް ބައެއް މީހުން ބުނެފައިވާ ކަމަށެވެ.
"އޭނާގެ އަންހެނުން ވެސް އެ ގޭގައި ދިރިއުޅޭ ކަމަށްވޭ. އޭނާ [އަންހެނުން] ގޭގައި އުޅެނިކޮށް ކަމަށް ވަނީ ވަޒަން ދޮރަށް އެރީ،" ކ.ހިންމަފުށީ ކައުންސިލްގެ ރައީސް އަހުމަދު ސިރާޖު ދުވަހު ނޫސް 'ހަވީރަށް' ދިން އިންޓަވިއުއެއްގައި ބުނެފައިވެއެވެ.
ހިންމަފުށީގައި މިއަދު ވަޒަނެއް އެރިގެ ހުންނަނީ އެެރަށުގެ އުތުރު ފަރާތުގައެވެ. އެއީ ސިފައިންގެ ތަމްރީން ޕްރޮގްރާމްތައް ކުރިއަށް ގެންދާ ގިރިފުއްޓާ ވީ ފަޅިއެވެ.
ހިންމަފުށީގެ ބައެއް ރައްޔިތުން ބުނާގޮތުގައި ވަޒަން އެރި ވަގުތު ގިރިފުށީގައި ތަމްރީންތައް ކުރިއަށް ދިޔަ ކަމަށެވެ. އަދި ބަޑީގެ އަޑި އިވެމުން ދިޔަ ކަމަށާއި ބަޑީގެ ފަރިތަކުރުންތައް ކުރިއަށްދާތީ އެ ސަރަހައްދުގެ ދަތުރު ފަތުރު ވެސް އޮތީ މަނާކޮށް، ރަތް ދިދަ ނަގާފައި ކަމަށެވެ.
ވަޒަން އެރި މައްސަލަ ތަޙުގީގްކުރުމަށް ހިންމަފުށީގައި ފުލުހުންނާއި ސިފައިންގެ ހާއްސަ ޓީމެއް ހަރަކާތްތެރިވަމުންދާއިރު މިހާތަނަށް އަދި ފުލުހުންނާއި ސިފައިން މިކަމާއި ގުޅޭގޮތުން ވަކި އެއްޗެއް ހާމަކޮށްފައެއް ނުވެއެވެ.
ކ.ހިންމަފުށީގައި ހުންނަ އައްސޭރި ޖަލަކީ މާފުށީ ޖަލުގައި ހުންނަގޮތަށް ވަށައި ފާރު ރާނައި ވަކިކޮށްފައި ހުންނަ ތަނެއް ނޫނެވެ. 'އައްޑޫލައިވް' އަށް މައުލޫމާތު ލިބިފައިވާގޮތުގައި އައްސޭރި ޖަލަކީ ގައިދީންނަށް ޖަލުގެ ސަރަހައްދުގައި ނިކުމެ އުޅުވޭ ގޮތަށް ދޫކޮށްލާފައި އޮންނަ ލޯ ސެކިއުރިޓީ ޖަލެކެވެ. އަދި އެގޮތަށް ނިކުމެ ހަރަކާތްތެރިވާއިރު ހިންމަފުށީގެ ކައިރީގައި ހުންނަ ސިފައިންގެ ތަމްރީން މަރުކަޒު ޤާއިމްކޮށްފައިވާ ކ. ގިރިފުށި ވަރަށް ރީއްޗަށް ފެނެއެވެ.
ކ.ހިންމަފުއްޓާއި ސިފައިންގެ ތަމްރީން މަރުކަޒު ކަމުގައިވާ ގިރިފުއްޓާއި ދެމެދު ގާތްގަނޑަކަށް ހުންނަނީ 1 ކިލޯ މީޓަރުގެ ދުރުމިނެކެވެ. މިއަދު ވަޒަން އެރި ގެ ހުންނަނީ ވެސް ހިންމަފުށީ އައްސޭރި ޖަލު ހުންނަ ފަޅީގައި ކަން ފާހަގަކޮށްލެވެއެވެ.
ކ.ހިންމަފުށީ އައްސޭރި ޖަލުގައި ކާނަލް ނާޒިމްގެ އިތުރުން އެހެން ސިޔާސީ ކުށްވެރިން ވެސް ހުކުމް ތަންފީޒުކުރަމުން ގެންދާކަން ފާހަގަކޮށްލެވެއެވެ.