އިނގިރޭސި ޕްރިމިއާ ލީގުގައި ރޭ ލިވަޕޫލުން 2-0 އިން އެސްޓަން ވިލާ ބަލިކުރިއިރު، ބްރައިޓަން އަތުން 2-1 އިން މެންޗެސްޓާ ސިޓީ ބަލިވެއްޖެ އެވެ.
ލީގުގެ އެއްވަނައިގައި ލިވަޕޫލް މިހާރު އޮތީ 11 މެޗުން ލިބުނު 28 ޕޮއިންޓާ އެކު އެވެ. ދެވަނައިގައި ސިޓީ އޮތީ 11 މެޗުން ލިބުނު 23 ޕޮއިންޓާ އެކު އެވެ. ތިންވަނައިގައި 10 މެޗުން 19 ޕޮއިންޓް ހޯދައިގެން އޮތީ ނޮޓިންހަމް ފޮރެސްޓް އެވެ.
އަމިއްލަ ދަނޑުގައި ކުޅުނު މެޗުގެ 20 ވަނަ މިނެޓްގައި ލިވަޕޫލަށް ލީޑު ނަގައިދިނީ ޑާވިން ނުނޭޒް އެވެ. ލިވަޕޫލުން އުފެއްދި ކައުންޓަ އެޓޭކެއްގައި ނުނޭޒް މި ގޯލު ކާމިޔާބު ކުރީ ވިލާގެ ކީޕަރު މާޓިނޭޒް ކައިރިން ނައްޓާލުމަށްފަހު އެވެ. މި ގޯލަށްފަހު ވެސް ކައުންޓަ އެޓޭކުތަކުގައި ވިލާގެ ގޯލަށް ނުރައްކާ ކުރަން ލިވަޕޫލުން މަސައްކަތްކޮށްފައިވެ އެވެ.
މި މެޗުން ލިވަޕޫލަށް ތިން ޕޮއިންޓު ކަށަވަރުކޮށްދިން ގޯލު މެޗުގެ 84 ވަނަ މިނެޓްގައި ކާމިޔާބުކޮށްދިނީ މުހައްމަދު ސަލާ އެވެ. މިއީ މި ސީޒަނުގައި ކުޅުނު 17 މެޗުގައި ސަލާ ކާމިޔާބު ކުރި 10 ވަނަ ގޯލެވެ.
ލީގުގައި ކުޅުނު 11 މެޗުގެ ތެރެއިން ލިވަޕޫލް ބަލިވެފައިވަނީ އެންމެ މެޗަކުންނެވެ. ލިވަޕޫލުން 9 މެޗުން މޮޅުވެފައިވާއިރު އެއް މެޗު ނިމުނީ އެއްވަރުވެގެންނެވެ.
ބްރައިޓަން އަތުން ސިޓީ ބަލިވިއިރު، މިއީ ޖެހިޖެހިގެން ސިޓީ ބަލިވި ހަތަރުވަނަ މެޗުކަން ފާހަގަކޮށްލެވެ އެވެ. މިއީ 2006 ވަނަ އަހަރަށް ފަހު ޖެހިޖެހިގެން ހަތަރު މެޗުން ސިޓީ ބަލިވި ފުރަތަމަ ފަހަރެވެ.
ބްރައިޓަންގެ ދަނޑުގައި ކުޅުނު މި މެޗުގެ 23 ވަނަ މިނެޓްގައި އާލިން ހާލަންޑް ވަނީ ސިޓީ އަށް ލީޑު ނަގައިދީފަ އެވެ. ދެވަނަ ހާފުގައި ބްރައިޓަން އިން މޮޅު ކުޅުމެއް ދެއްކިއިރު، އެޓީމަށް ނަތީޖާ އެއްވަރުކޮށްދިނީ މެޗުގެ 78 ވަނަ މިނެޓްގައި ޖައޯ ޕެޑްރޯ އެވެ. އަދި އޭގެ ފަސް މިނެޓް ފަހުން ބްރައިޓަން މޮޅުވި ގޯލު ކާމިޔާބުކޮށްދިނީ މެޓް އޯ ރައިލީ އެވެ.
މި މޮޅާއެކު ބްރައިޓަން ވަނީ 11 މެޗުން ލިބުނު 19 ޕޮއިންޓާ އެކު ލީގުގެ ހަތަރުވަނަ މަގާމަށް ޖެހިލާފަ އެވެ.