ސްރީ ލަންކާގައި ޓޫރިސްޓުންގެ މެދުގައި މަގުބޫލު އަރުގަމް ބޭ ސަރަހައްދުގައި މިދިޔަ މަހު ވަރުގަދަ ހަމަލާތަކެއް ދޭން ރޭވުމުގެ ފަހަތުގައި އޮތީ އިރާން ކަމަށް އެމެރިކާ އިން ތުހުމަތުކޮށްފި އެވެ.
މިދިޔަ ހަފުތާފައި ބޭއްވި އެ ގައުމުގެ ރިޔާސީ އިންތިހާބު ކާމިޔާބު ކުރެއްވި ރިޕަބްލިކަން ޕާޓީގެ ކެންޑިޑޭޓް ޑޮނަލްޑް ޓްރަމްޕާ ހަވާލާދީ ޖަސްޓިން ޑިޕާޓްމަންޓުން ބުނީ ކެމްޕޭން ތެރޭގައި ޓްރަމްޕް އަވަހާރަކޮށްލަން ރޭވިކަމުގެ ތުހުމަތު ކުރެވޭ އިރާންގެ މީހެއް ކަމަށްވާ ފަރުހާދު ޝަކޭރީ އަކީ ލަންކާގެ ހަމަލާ ވެސް ރޭވުމުގައި އެންމެ އިސްކޮށް އުޅުނު މީހާ ކަމަށެވެ.
އެ މައްސަލައިގައި އެފްބީއައި އިން ޝަކޭރީއާ ގުޅޭ ތަހުގީގެއް ފަށައި، އޭނައާ ގުޅުން ހުރި ދެ މީހަކު އެމެރިކާ އިން ހައްޔަރު ވެސް ކޮށްފައިވެ އެވެ.
އަދި އެ ތަހުގީގުގެ ތެރެއިން ލަންކާގެ ހަމަލާ ރޭވީ އިރާންގައި ހުރެގެން ޝަކޭރީ ކަމަށާއި އެމެރިކާ މީހުން ލަންކާ އަށް ދަތުރު ކުރުމުގައި ސަމާލުބުމަށް މިދިޔަ މަހުގެ 23 ގައި އެޑްވައިޒަރީއެއް ވެސް ނެރުނީ ހަމަލާގެ މައުލޫމާތު ލިބިގެން ކަމަށް ބުނެފައިވެ އެގޮތުން އަރުގަމް ބޭ އަށް ހަމަލާދޭން ރޭވީ ލަންކާގައި ތިބި އިޒްރޭލުގެ ޓޫރިސްޓންނަށް އަމާޒުކޮށް ކަމަށާއި ހަމަލާދޭން އުޅުނީ މިދިޔަ މަހުގެ ފަހިކޮޅު ކަމަށް ވެސް ޖަސްޓިސް ޑިޕާޓްމަންޓުން ބުނެފައިވެ އެވެ.
ލަންކާގައި ދޭން އުޅުނު އެ ހަމަލާއާ ގުޅިގެން މިދިޔަ މަހުގެ 24 ވަނަ ދުވަހު، އެ ގައުމުގެ ޓެރަރިޒަމް އިންވެސްޓިގޭޝަން ޑިވިޝަން (ޓީއައިޑީ) އިން ދެ މީހަކު ހައްޔަރު ވެސް ކުރި އެވެ. އޭގެ ތެރެއިން އެކަކީ ރާއްޖެ އަށް ނިސްބަތްވާ މީހެއް ކަމަށް ވެސް ބުނެފައިވެ އެވެ.
ލަންކާގެ އާބާދީގެ ބޮޑު ބަޔަކީ ބުޑިސްޓުން ކަމަށް ވިޔަސް އިޒްރޭލުން ފަލަސްތީނުގައި ހިންގަމުންދާ ލާއިންސާނީ ޖަރީމާތަކާ ދެކޮޅަށް ލަންކާގެ މުސްލިމުން ކުރާ މުޒާހަރާތަކުގައި އެ ގައުމުގެ ގިނަ ބަޔަކު ބައިވެރިވެ ތަރުހީބު ދެމުން އަންނަކަން ފާހަކުރެވެ އެވެ.
ލަންކާ އަށް ހަމަލާދޭން އުޅުނީ އިރާން އަޑީގެން އޮވެގެން ކަމަށް ތުހުމަތު ކުރުމާ ގުޅިގެން އެ ގައުމުގެ ފޮރިން މިނިސްޓްރީން އިއްޔެ ނެރުނު ބަޔާނެއްގައި ބުނީ އެމެރިކާގެ ތުހުމަތަކީ އެއްވެސް އަސާސެއް ނެތް ތުހުމަތެއް ކަމަށެވެ. އަދި ހަގީގަތެއް ނެތް އެފަދަ ތުހުމަތުތަކެއް މީގެ ކުރިން ވެސް އިރާނާ މެދު ކޮށްފައިވާ ކަމަށް ބުނެފައިވެ އެވެ.