އަންނަ އަހަރުގެ ޖެނުއަރީ މަހު ސިނަމާތަކަށް ގެންނަން ނިންމާފައިވާ އިންޑިއާގެ ފިލްމު "ގޭމް ޗޭންޖާ" ގެ ޓީޒާ ޓްރެއިލާ ދައްކާލައިފި އެވެ.
އަންނަ އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ މި ފިލްމަކީ ކުޅަދާނަ ތަމަޅަ ޑައިރެކްޓަރު ޝަންކަރު ހަދާފައިވާ ޕޮލިޓިކަލް އެކްޝަން ތުރިލާއެކެވެ. "ގޭމް ޗޭންޖާ" ގެ ބަތަލަކީ "އާރްއާރްއާރް" ފަދަ ކާމިޔާބު ފިލްމުތައް ކުޅެފައިވާ މަޝްހޫރު ތެލެގޫ އެކްޓަރު ރާމް ޗަރަން އެވެ. ފިލްމުގެ ބަތަލާ އަކީ ބޮލީވުޑްގެ ކިއާރާ އަދުވާނީ އެވެ.
"ގޭމް ޗޭންޖާ" ސިނަމާތަކަށް ގެންނަން ހަމަޖެހިފައި ވަނީ ޖެނުއަރީ 10 ގަ އެވެ.
މީގެ ޑައިރެކްޓަރު ޝަންކަރްގެ އެންމެ ފަހުގެ ފިލްމަކީ 1996 ގެ "އިންޑިއަން" ގެ ސީކްއެލް "އިންޑިއަން 2" އެވެ. ކަމަލް ހަސަނާ އެކީ ގެނެސްދިން އެ ފިލްމަކީ ބެލުންތެރިންގެ ވަރަށް ފިނި ތަރުހީބެއް ލިބުނު ފިލްމެކެވެ.
"ގޭމް ޗޭންޖާ" އަކީ 450 ކްރޯޑް ރުޕީސް (53.5 މިލިއަން ޑޮލަރު) ގެ ބަޖެޓަކުން ހަދާފައިވާ ފިލްމެކެވެ.