މި ސަރުކާރުން ރާއްޖޭގެ 7 ރަށެއް އާބަން ސެންޓަރުތަކުގެ ގޮތުގައި ތަރައްގީ ކުރާ އިރު، އެއިން ކޮންމެ ތަނެއްގައި މަދުވެގެން 10،000 މީހުންގެ އާބާދީއެއް އުޅޭނެ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.
އާބަން ސެންޓަރުގެ ގޮތުގައި ތަރައްގީ ކުރަން ކަނޑައަޅާފައި ވަނީ ރ. އުނގޫފާރު، ބ. އޭދަފުށި، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ އަދި ލ. ފޮނަދު އެވެ.
މިކަމާ ގުޅޭ ގޮތުން ދައުލަތުގެ މީޑިއާ، ޕީއެސްއެމްގައި މިނިސްޓަރު ވިދާޅުވީ އާބަން ސެންޓަރުތަކުގެ އާބާދީއަކީ މަދުވެގެން 10،000 ކަމަށާއި، އުތުރާއި ދެކުނުގައި ގާއިމުކުރާ އާބަން ޑިވެލޮޕްމެންޓް ރީޖަންތަކުގެ އާބާދީއަކީ ކޮންމެ ރީޖަނެއްގައި 100،000 މީހުން ކަމަށެވެ.
މިނިސްޓަރު ވިދާޅުވީ އާބަން ސެންޓަރުތަކަކީ ރާއްޖެ އެއްފަސް ކުރުމުގެ ބޭނުމުގައި ގާއިމުކުރާ ތަންތަން ކަމަށާއި އެ ސެންޓަރުތައް ގާއިމްކުރަން ރަށްތައް ކަނޑައަޅާފައި ވަނީ އެހެން ރަށްރަށަށް ވުރެ ހިދުމަތް ރަގަޅު އަދި ބޮޑުކުރެވޭނެ ރަށްތަކަށް ބަލައިގެން ކަމަށެވެ.
"އާބާދީއާ ތަރައްގީ އެއްފަސް ކުރުމުގެ ވަރުގަދަ ޕްރޮގްރާމެއް ހިންގައިގެން ނޫނިއްޔާ ރާއްޖޭގެ އެންމެންނަށް ބޭނުންވާ ހިދުމަތްތަކެއް ދެވޭކަށް ނެތް." ހައިދަރު ވިދާޅުވި އެވެ.
މިނިސްޓަރު ފާހަގަކުރެއްވި ގޮތުގައި މާލެ ފިޔަވައި 186 ރަށުގައި މީހުން ދިރިއުޅޭ އިރު، އޭގެ ތެރެއިން 55 ރަށަކީ 500 މީހުން ހަމަނުވާ ރަށްރަށެވެ. އެހެންވެ އެ ރަށްރަށުގައި އުމްރާނީ ތަރައްގީގެ މަޝްރޫއުތައް ހިންގާ ނަމަ ދައުލަތުގެ ބަޖެޓުން ވަރަށް ބޮޑެތި "ބޭކާރު" ހަރަދުތައް ހިނގާނެ ކަމަށެވެ.
"އޭގެ ބަދަލުގައި ފޯކަސްޑް ރަށަކަށް އިންވެސްޓްމެންޓާ ތަރައްގީ ގެނެވެއްޖެކަމަށް ވަންޏާ އޭގެ ފައިދާ މުޅި މުޖުތަމައުއަށް އަންނާނެ،" ހައިދަރު ވިދާޅުވި އެވެ. "މާލެއަށް ކޮންމެ ފަހަރަކު ހިދުމަތެއް ހޯދަން އަންނާކަށް ނުޖެހޭނެ."
މިނިސްޓަރު ވިދާޅުވި ގޮތުގައި އުތުރާއި އާބަން ޑިވެލޮޕްމެންޓް ރީޖަންތައް ތަރައްގީ ކުރާނީ މާލެއާ އެއްފެންވަރަށް ކަމަށދެވެ. އެހެންވެ އެ ރީޖަންތަކުން އެއްވެސް ގޮތަކަށް ހިދުމަތް ހޯދަން މާލެ އަންނަން ނުޖެހޭނެ ކަމަށް ވިދާޅުވި އެވެ.