ސެޕްޓެމްބަރު މަހު ސިނަމާތަކަށް ގެނެސްގެން މާ ބޮޑު ތަރުހީބެއް ނުލިބުނު ކަރީނާ ކަޕޫރްގެ ކްރައިމް ތުރިލާ "ދަ ބަކިންހަމް މާޑާސް" ނެޓްފްލިކްސް އަށް ދޫކޮށްލައިފި އެވެ.
އިނގިރޭސިވިލާތުގައި ޝޫޓްކޮށްފައިވާ މި ފިލްމަކީ އެކްތާ ކަޕޫރާ އެކީ ކަރީނާ ވެސް ޕްރޮޑިއުސަރެއްގެ ގޮތުގައި ހިއްސާވެ، ހެންސަލް މެހެތާ ޑައިރެކްޓްކުރި ފިލްމެކެވެ. ކަރީނާ ވަރަށް ސީރިއަސް ރޯލެއް ކުޅެފައިވާ މި ފިލްމުގެ ކާސްޓްގައި އޭނަ ނޫނީ މަޝްހޫރު އެއްވެސް ތަރިއަކު ނުހިމެނެ އެވެ. "ބަކިންހަމް މާޑާސް" ގައި ކަރީނާ ކުޅެފައި ވަނީ ގެއްލިފައިވާ ކުޑަކުއްޖެއްގެ ކޭސްއެއް ހަވާލުކުރާ ޑިޓެކްޓިވެއްގެ ރޯލެވެ.
މި ފިލްމަކީ މި އަހަރު ރިލީޒްވި އޭނަގެ ތިން ވަނަ ފިލްމެވެ. ފުރަތަމަ ފިލްމަކީ މާޗްގައި ރިލީޒްކޮށް، ބޮޑު ތަރުހީބެއް ލިބުނު "ކްރޫ" އެވެ. އަދި މިހާރު އިންޑިއާގެ ބޮކްސް އޮފީހުގައި ރަސްކަން ކުރަމުން އަންނަ އަޖޭ ދޭވްގަންގެ "ސިންގަމް އެގެއިން" ގެ ބަތަލާ އަކީ ވެސް ކަރީނާ އެވެ.
ރިޕޯޓްތައް ބުނާ ގޮތުން ކަރީނާ ދެން އެންމެ އަވަހަށް ޝޫޓިން ފަށާނެ ފިލްމަކީ ޑައިރެކްޓަރު މެގްނާ ގުލްޒާރުގެ "ދާއިރާ" އެވެ.