މި އަހަރު ރިލީޒްކޮށް ބޮޑު ތަރުހީބެއް ލިބުނު ތެލެގޫ ސައިންސް ފިކްޝަން ފިލްމު "ކަލްކީ 2898 އޭޑީ" ގެ ޑައިރެކްޓަރު ނާގް އަޝްވިންގެ ފިލްމެއް ބޮލީވުޑްގެ ބަތަލާ އާލިއާ ބަޓަށް ހުށަހަޅާފައިވާ ކަމަށް ރިޕޯޓްތައް ބުނެފި އެވެ.
މިޑް-ޑޭ އިން އިން ބުނީ މި ފިލްމަކީ އަންހެން ކެރެކްޓާއެއްގެ ވަށައިގެން އެނބުރޭ ވާހަކައަކަށް ބިނާ ހަދަން ނިންމާފައިވާ ކަމަށެވެ. އެގޮތުން އާލިއާ އަށް ފިލްމު ހުށަހަޅައި ދެ ފަރާތުގެ މެދުގައި މިހާރު މަޝްވަރާތަކެއް ކުރިއަށްދާ ކަމަށާއި ޕްލޭން ކުރަނީ އަންނަ އަހަރުގެ މެދުތެރޭގައި އެ ފިލްމުގެ ޝޫޓިން ފަށަން ކަމަށް ވެސް އެ ނޫހުން ބުންޏެވެ.
ނަމަވެސް މިކަމާ ބެހޭ ގޮތުން އަޝްވިން އާއި އާލިއާ ވެސް އަދި ރަސްމީކޮށް އެއްވެސް އެއްޗެއް ބުނެފައެއް ނުވެ އެވެ.
އާލިއާ މިހާރު އަންނަނީ ޔާޝްރާޖް ފިލްމްސް (ވައިއާރްއެފް) ގެ ސްޕައި ޔުނިވާސްގެ "އަލްފާ" ގެ މަސައްކަތް ކުރަމުންނެވެ. އަދި އޭނަ އަންނަ މަހުގެ ތެރޭގައި ޑައިރެކްޓަރު ސަންޖޭ ލީލާ ބަންސާލީގެ "ލަވް އެންޑް ވޯ" ގެ ކްރޫއާ ވެސް ގުޅޭނެ އެވެ. އެ ފިލްމުގެ ބަތަލުންނަކީ އާލިއާގެ ފިރިމީހާ ރަންބީރް ކަޕޫރާއި ވިކީ ކޯޝަލެވެ.
މިދިޔަ މަހު ރިލިޒްކުރި "ޖިގްރާ" ގެ ބަތަލާ ކުރިން ވެސް އިންޑިއާގެ ދެކުނު މަޝްހޫރު ޑައިރެކްޓަރެއްގެ ފިލްމެއް ކުޅެފައިވެ އެވެ. އެއީ "ބާހްބަލީ" ގެނެސްދިން އެސްއެސް ރާޖަމޯލީގެ 2022 ގެ "އާރްއާރްއާރް" އެވެ.
މި އަހަރުހެ ޖޫންގަައި ރިލީކުރި "ކަލްކީ" އަކީ "ބާހްބަލީ" ގެ އެކްޓަރު ޕްރަބާސް ބަތަލުގެ ރޯލު ކުޅުނު ފިލްމެކެވެ. އޭގެ ކާސްޓްގައި ބޮލީވުޑްގެ ތަރިން ކަމަށްވާ ދީޕިކާ ޕަދްކޯނާއި އަމީތާބް ބައްޗަން އަދި ޑިޝާ ޕަޓާނީ ވެސް ހިމެނެ އެވެ.