އައްޑޫ ސިޓީގައި ކުރިއަށްދާ 15 ވަނަ ވޯލްޑް ބޮޑީބިލްޑިން އެންޑް ފިޒިކް ސްޕޯޓްސް ޗެމްޕިއަންޝިޕްގައި އާންމުންގެ ކަންބޮޑުވާ ކަންތައްތަކެއް ހުރުމުން ބޮޑީބިލްޑިން އެސޯސިއޭޝަން (ބީބީއޭއެމް) އިން މައާފަށް އެދިއްޖެ އެވެ.
ރާއްޖެ ހިމެނޭ ދުނިޔޭގެ ވަރަށް ގިނަ ގައުމުތަކުން ބައިވެރިވާ 15 ވަނަ ވޯލްޑް ބޮޑީބިލްޑިން އެންޑް ފިޒިކް ސްޕޯޓްސް ޗެމްޕިއަންޝިޕް ކުރިިއަށް ދަނީ އައްޑޫ ކެނަރީފް ރިސޯޓްގަ އެވެ. މި މަހުގެ 5 ގައި ފެށި އެ މުބާރާތުގެ އެންމެ ފަހުގެ އިވެންޓް އޮންނާނީ މާދަމާ އެވެ.
މިއީ ވޯލްޑް ބޮޑީބިލްޑިން ފެޑެރޭޝަނާއި ބީބީއެމް ގުޅިގެން ބާއްވާ މުބާރާތެކެވެ. ޔޫތު މިނިސްޓަރު އަބްދުﷲ ރާފިއު 15 ވަނަ ވޯލްޑް ބޮޑީބިލްޑިން އެންޑް ފިޒިކް ސްޕޯޓްސް ޗެމްޕިއަންޝިޕް ރަސްމީކޮށް ލޯންޗްކޮށް ދެއްވީ މިދިޔަ މަހުގެ 7 ގަ އެވެ.
ނިވާކަން ކުޑަ ގޮތަކަށް ދެ ޖިންސުގެ ބޮޑީބިލްޑަރުން ބައިވެރިވެގެން ބާއްވާ މި މުބާރާތާއި ގުޅިގެން އާންމުންގެ ކަންބޮޑުވުންތަކެއް ހުރުމުން ބީބީއޭއެމް އިން ނެރުނު ބަޔާނެއްގައި ބުނީ މި މުބާރާތް ކުރިއަށް ގެންދިޔުމަށްޓަކާ ރައީސުލްޖުމްހޫރިއްޔާގެ ތަސައްވުރާއި ސްޕޯޓްސް މިނިސްޓްރީން އިރުޝާދު ދީފައިވާ ގޮތަށް ކުރިއަށް ގެންދަން މަސައްކަތް ކުރި ކަމަށެވެ. ނަމަވެސް މި މުބާރާތާ ގުޅިގެން ފެތުރެމުންދާ ހަބަރުތަކާއި ގުޅިގެން އާންމުން ރައްޔިތުންގެ ކަންބޮޑުވުން ހުރުމާއެކު ރައީސް ޑރ. މުހައްމަދު މުއިއްޒާއި ދިވެހި ރައްޔިތުންގެ ކިބައިން މައާފަށް އެދޭ ކަމަށް ބުނެފައިވެ އެވެ.
"މުސްތަގުބަލުގައި މިފަދަ ކަމެއް ތަކުރާރު ނުވާނެ ކަމުގެ ފުރިހަމަ ޔަގީންކަން ރައްޔިތުންނަށް އަރުވަމެވެ،" އެ ބަޔާނުގައިވެ އެވެ.
އެ ބަޔާނުގައިވާ ގޮތުން މިފަދަ މުބާރާތެއް އެ އެސޯސިއޭޝަނުގެ ފަރާތުން ހޮސްޓް ކުރުމަށް މަސައްކަތް ކޮށްފައިވަނީ ރާއްޖޭގެ ޕްރޮފައިލް ބައިނަލްއަގުވާމީ ކުޅިވަރު ދުނިޔޭގައި ވަރުގަދަ ކުރުމަށާއި، މިކަމުގެ ސަބަބުން ރާއްޖޭގެ އިގްތިސާދަށާއި ޓޫރިޒަމަށް ލިބޭނެ ކުރިއެރުމަށް ވިސްނައިގެންނެވެ.
މިއަހަރު ބޭއްވުނު މުބާރާތަކީ ވަރަށް ދުލާރާ މަސައްކަތްކޮށް އެހެން ގައުމުތަކާއި ވާދަކޮށް ރާއްޖޭގައި ހޮސްޓް ކުރުމަށް ލިބުނު ފުރުސަތެއް ކަމަށް ބީބީއޭއެމް އިން ބުނެ އެވެ. އަދި މި މުބާރާތް ބޭއްވުން ކެންސަލްކޮށްފިނަމަ ރާއްޖޭގެ ކުޅިވަރު އެސޯސިއޭޝަންތަކަށާއި ޖުމްލަ ގޮތެއްގައި ރާއްޖެ އަށް މާލީ ގޮތުންނާއި އެހެނިހެން ގޮތްގޮތުން ލިބިދާނެ ގެއްލުންތަަކަށް ވިސްނުމަށްފަހު މުބާރާތް ބޭއްވުމަށް ނިންމީ ކަމަށްވެސް އެ އެސޯސިއޭޝަނުން ބުނެފައިވެ އެވެ.