ޗާގޯސްގެ ސިޔާދަތީ ބާރު މޮރިޝަސްއަށް ދިނުމަށް އިނގިރޭސިވިލާތުން މިދިޔަ މަހުގެ ކުރީކޮޅު ނިންމި ނިންމުމާއެކު ދިވެހި ސަރުކާރުގެ ސިޓީއެއް އިނގިރޭސި ސަރުކާރަށް ފޮނުވާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ޖުމްހޫރީ ދުވަހުގެ ރަސްމީ ޖަލްސާގައި މިރޭ ވާހަކަފުޅުދައްކަވަމުން ރައީސް ވިދާޅުވީ ކުރީ ސަރުކާރުން ކަނޑުން ގެއްލުވާލި ބައި ހޯދުމަށް ސަރުކާރުން ރެޔާއި ދުވާލު މަސައްކަތް ކުރަމުންދާ ކަމަށެވެ. އެގޮތުން ކުރެވޭ މަސައްކަތުގެ ތެރެއިން އިނގިރޭސި ސަރުކާރަށް ދިވެހި ސަރުކާރުގެ ސިޓީއެއް މިހާރު ފޮނުވާފައިވާނެ ކަމަށް ރައީސް ވިދާޅުވި އެވެ.
"އެތަނަކީ އަޅުގަނޑުމެންގެ ރަސްރަސްކަލުންގެ ލިޔެކިޔުންތައް ފެންނަން ހުރުމާއެކީގައި، އެހެން ގައުމަކަށް ވުރެ ދިވެހިރާއްޖެ އަށް މާ އައުލާކަން ބޮޑު ރާއްޖޭގެ ތަނެއްގެ ގޮތުގައި ވެސް ބެލިދާނެ ކަމެއް ކަމަށް ތާރީހީ ގޮތުން ފެންނަން ހުރުމާއެކުގައި، އެކަން ފާހަގަކޮށް އަޅުގަނޑުމެން މިހާރު ވާނީ ސިޓީއެއް ފޮނުވާފައި،" ރައީސް ވިދާޅުވި އެވެ.
މިކަމުގައި އުއްމީދަކީ އިންސާފުވެރިކަމާ އެކު އެކަމުގައި ފައިސަލާކުރުން ކަމަށާއި ޒިންމާ އިން ރެކިވަޑައިނުގަންނަވާނެ ކަމަށްވެސް ރައީސް ވިދާޅުވި އެވެ.
ޗާގޯސްގެ ސިޔާދަތީ ބާރު މޮރިޝަސް އަށް ދޫކޮށްލަން އިނގިރޭސީން ނިންމީ މިކަމާ ގުޅޭ މަޝްވަރާތަކެއް ކުރިއަށްދާތާ ޒަމާންތަކެއް ފަހުންނެވެ.
މި ނިންމުމާ ގުޅިގެން މިކަމާ ގުޅޭ ގޮތުން އިނގިރޭސިވިލާތާއި މޮރިޝަޝްސް މުއާހަދާއެއްގައި ސޮއިކުރާނެ އެވެ. މިއާ އެކީ އިނގިރޭސީންގެ އަސްކަރީ މަރުކަޒެއް އޮތް ޑިއެގޯ ގާސިއާގެ ކޮންޓްރޯލް ނުގެއްލޭ ގޮތަށް ޗާގޯސްގެ ސިޔާދަތީ ބާރުވެރިކަން މޮރިޝަސްއާ ހަވާލު ކުރެވޭނެ އެވެ.