ރައްޔިތުންގެ ފަޅީގައި ހުންނަވައިގެން ކުރައްވާނީ ތެދުވެރި ވެރިކަމެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ޖުމްހޫރީ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ރައްޔިތުން އެމަނިކުފާނާ ހަވާލުކުރި ޒިންމާ އަދާކުރުމުގައި ކޮންމެ ހިނދުކޮޅެއް ވެސް ހޭދަކުރަނީ ރައްޔިތުން ހަވާލުކުރީ ވަރުގަދަ ޒިންމާއެއްކަން ގަބޫލުކޮށްގެން ކަމަށެވެ. އެގޮތުން އެމަނިކުފާނާއި، ވަޒީރުންނާއި ރައްޔިތުންގެ މަޖިލީހުގެ މެމްބަރުންނާއި ކުންފުނިތަކުގެ ވެރިން ފަދަ ބޭފުޅުން ކުރައްވަނީ އެ މަސައްކަތް ކަމަށް ރައީސް ވިދާޅުވި އެވެ.
"އަޅުގަނޑުމެން މިތިބީ ރައްޔިތުންނާ އެކީގައޭ، ރައްޔިތުންގެ ފަޅީގައޭ. ދެން ވެސް ތިބޭނީ އިރާދަކުރެއްވީތީ ރައްޔިތުންގެ ފަޅީގައި،" ރައީސް ވިދާޅުވި އެވެ.
"ރައްޔިތުންނަށްޓަކާ ކުރާ ހަގީގީ އިހުލާސްތެރި، ތެދުވެރި ވެރިކަމެއް ކުރާތަނޭ ރައްޔިތުންނަނށް ފެނިގެންދާނީ ކުރިއަށް އޮތް ތަނުގައި ވެސް،"
ރައީސް ވިދާޅުވީ މި ވެރިކަމަށްވީ އެއް އަހަރުގައި މަސައްކަތްކުރެއްވީ ރައްޔިތުންގެ ފަޅީގައި ހުންނަވައިގެން ކަމަށާއި ގިނަ ދުވަސްތަކެއް ވަންދެން އަތްނުލާ ހުރި ބޮޑެތި މައްސަލަތައް ހައްލުކުރެވޭތޯ ބަލަމުން އަންނަނީ އެހެންވެ ކަމަށެވެ. އެގޮތުން ޑުރަގްގެ މައްސަލަތަކާއި، ގޭންގު މާރާމާރީއާއި، ވޭޕު މަނާކުރުމާއި މެޑިކަލް މާފިއާއާއި ޑޮލަރުގެ ކަޅު ބާޒާރުގެ މައްސަލަ ހައްލުކުރަން މަސައްކަތް ފެއްްޓެވީ އެހެންވެކަމަށް ރައީސް ވިދާޅުވި އެވެ.
މިއީ ބުރަ ބޮޑު މަސައްކަތްތަކެއް ކަމަށާއި ނަމަވެސް ރައްޔިތުންގެ އެއްބާރުލުމާއެކު މި ކަންކަން ކުރިއަށް އޮތް މުއްދަތުގައި ހައްލުވާނެކަމަށް ރައީސް ވިދާޅުވި އެވެ.