ސިޔާސީ ވާދަވެރިޔާ ޖަލަށްލާތަން ދެން ނުފެންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ޖުމްހޫރީ ދުވަހުގެ ރަސްމީ ޖަލްސާގައި ރޭ ވާހަކަފުޅުދައްކަވަމުން ރައީސް ވިދާޅުވީ ވެރިކަމަށް ވަޑައިގެން، ރާއްޖޭގައި ޒަމާނުއްސުރެ އޮތް ސިޔާސީ ގޮތުން ބަދަލުހިފުމުގެ ރޫހު ނައްތާލާފައިވާ ކަމަށެވެ.
"އަޅުގަނޑުގެ ވާދަވެރިޔާ އެއީ، ސިޔާސީ ވާދަވެރިއަަށްވާތީ ހިފާ ހައްޔަރުކޮށް، ޖަލަށްލީ ތަނެއް، މިދިޔަ އެއް އަހަރު ތެރޭގައެއް ނުފެންނާނެ. ކުރިއަށް އޮތް ތަނުގައި ވެސް ނުފެންނާނެ،" ރައީސް ވިދާޅުވި އެވެ.
ރައީސް ވިދާޅުވީ ސިޔާސީ ވާދަވެރިކަމުގައި ބަދަލު ހިފުމުގެ ގޮތުން ކުރިން މީހުން ފްރޭމްކޮށްގެންނާއި އެކި ގޮތް ގޮތުން އަނިޔާވެރިކަމާއި އެކު ހައްޔަރުކޮށް ޖަލަށްލާފައިވާ ކަމަށެވެ. އަދި އެކަމުގައި ތިމާގެ މީހެއް އެކުވެރިއަކަށް ވެސް ބަލާފައި ނުވާ ކަމަށާއި ނަމަވެސް ސިޔާސީ މީހަކު ވެއްޖެއްޔާ އެމީހަކު ދުރައްލާ އަނިޔާދިން ޒަމާން މި ވެރިކަމާއި އެކު ތާއަބަދަށް ނިމިގެން ގޮސްފައިވާކަމަށް ރައީސް ވިދާޅުވި އެވެ.
މި ސަރުކާރުން ރިޔާސީ ކޮމިޝަން ފަދަ ކޮމިޝަންތައް ހަދައިގެން ސިޔާސީ މީހުންގެ ކަންކަން ނުބަލާނެ ކަމަށާއި އެހެންނަމަވެސް ނުހައްގުން ފައިދާ ހޯދާ ދައުލަތުން ވައްކަން ކުރި މީހުންގެ މައްސަލަ އެކަމަށް އޮންނަ ނިޒާމުގެ ތެރެއިން ބަލާނެ ކަމަށް ވިދާޅުވި އެވެ. އެގޮތުން އެކަންކަން ބަލާނީ އެކަމަށް ކަނޑައެޅިފައިވާ މިނިވަން މުއައްސަސާތަކުގެ ތެރެއިން ކަމަށްވެސް ވިދާޅުވި އެވެ.
"އެކަމަކު ކުރީގައި ފެނުނު ގޮތަށް، އެކި ކަހަލަ ކޮމިޝަންތައް ހަދައިގެން، ސިިޔާސީ ގޮތުން މީހުންގެ ފަހަތުން ދުވެ، ގައުމުގެ ހަމަޖެހުން ނަގާލުމަކީ ރައްޔިތުން އެދޭ ގޮތެއް ނޫން." ރައީސް ވިދާޅުވި އެވެ.