އެމަނިކުފާނު އަބަދުވެސް ދައްކަވަމުން ގެންދަވަނީ އެއް ވާހަކައެއް ކަމަށާއި ވާހަކަ އޮޅުވާލައި، ދޮގު ހަދަނީ ވާދަވެރިން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ޖުމްހޫރީ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ އާބަން ސެންޓަރުތަކާ ގުޅޭގޮތުން އިދިކޮޅު އެމްޑީޕީގެ އިސްވެރިން ދައްކަމުންދާ ވާހަކަތަކަށް ރައްދު ދެއްވަމުންނެވެ.
އާބަން ސެންޓަރުތަކުގެ ގޮތުގައި ތަރައްގީކުރާނެ 7 ރަށް މިއަދު ވަނީ ކަނޑައަޅާފަ އެވެ. އެ 7 ރަށަކީ ރ. އުނގޫފާރު، ބ. އޭދަފުށި، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ އަދި ލ. ފޮނަދު އެވެ.
މި ރަށްތަކުގެ ތެރޭގައި އެންމެ އުތުރާއި އެންމެ ދެކުނުގެ ރަށެއް ހިމެނިފައި ނުވާތީ ބައެއް ފަރާތަކުން ދަނީ ކަންބޮޑުވުން ފާޅުކުރަމުންނެވެ.
ޖުމްހޫރީ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ހުރިހާ ފަރާތްތަކެއްގެ ހިޔާލާއި މަޝްވަރާއާއެކު ރާއްޖޭގެ ތަރައްގީގެ ޕްލޭނެއް އެކުލަވާލައި، އެ ޕްލޭނަށް ގާނޫނީ ބާރުވެރިކަން ދޭން ބޭނުންވާ ކަމަށް ވައުދުވެވަޑައިގެންނެވި ކަމަށާއި އެ މަސައްކަތް މިހާރު ފެށިފައިވާ ކަމަށެވެ. ނަމަވެސް މިކަން ވެސް ބައެއް މީހުން އޮޅުވާލަން މަސައްކަތް ކުރަމުންދާ ކަމަށް ރައީސް ވިދާޅުވި އެވެ.
އަދި ރާއްޖޭގެ އެހެން ސަރަހައްދުތައް ޝާމިލުވާހެން، 7 އާބަން ސެންޓަރެއް ރާއްޖޭގެ 7 ސަރަހައްދެއްގައި ފައްކާކުރެވޭނެ ކަމަށް މީގެކުރިން ވެސް ދަންނަވާފައިވާ ކަމަށާއި އެ ވާހަކައަށް މިހާތަނަށް ވެސް ބަދަލެއް އައިސްފައި ނުވާނެ ކަމަށް ރައީސް ވިދާޅުވި އެވެ. އަދި އެފަދަ ދޮގުތަކުން އެ ބޭފުޅުން އަމިއްލަ އަށް ފަޟީހަތް ވެގެންދާ ކަމަށްވެސް ވިދާޅުވި އެވެ.
"އަޅުގަނޑު އަބަދުވެސް އެއް ވާހަކައެއް ދައްކަނީ. ސިޔާސީ ގޮތުން އަޅުގަނޑުމެންގެ ވާދަވެރިން ވާހަކަ އޮޅުވާލަން ދޮގު ހަދަނީ. ދޮގު ހަދާ މީހުންނަށް ހެދެނީ ދޮގުކަން ނޭނގި، އަޅުގަނޑުމެން ބޮލުގައި ދޮގު އަޅުވަން އުޅުމަކީ އެ ބޭފުޅުން އަމިއްލަ ފަޟީހަތްވާ ކަމެއް ކަމަށް އަޅުގަނޑަށް ގަބޫލުކުރެވެނީ،" ރައީސް ވިދާޅުވި އެވެ.