އިންޑިއާ މީހުންގެ މެދުގައި ތައިލޭންޑްގެ ޓޫރިޒަމް ޕްރޮމޯޓްކުރަން އެމްބެސެޑަރެއްގެ އިތުރުން އެ ގައުމުގެ ޓޫރިޒަމް އެޑްވައިޒަރަކަށް އިންޑިއާގެ ފިލްމީ ތަރި ސޯނޫ ސޫދު ހަމަޖައްސައިފި އެެވެ.
މިކަން ސޯނޫ ސޯޝަލް މީޑިއާ ޕޯސްޓެއްގައި ވެސް ފޭނުންނާ ހިއްސާކޮށްފައިވެ އެވެ. އޭނަ ބުނީ ތައިލޭންޑުން ލިބުނު މި ފުރުސަތަކީ ބޮޑު ޝަރަފެއް ކަމަށާއި އޭނައާ ހަވާލުކުރި ޒިންމާތައް ވަރަށް ފުރިހަމައަށް އަދާކުރަން މަސައްކަތް ކުރާނެ ކަމަށެވެ.
މީގެ ކުރިން ވެސް އިންޑިއާގެ މަޝްހޫރު އެކިއެކި ފިލްމީ ތަރިން ބޭރުގެ އެކި ގައުމުތަކުގެ ޓޫރިޒަމް އެމްބެސެޑަރުންގެ ގޮތުގައި ހަމަޖައްސާފައިވެ އެވެ.
ސޯނޫ އަކީ ބޮލީވުޑްގެ އިތުރުން އިންޑިއާގެ ދެކުނުގެ ފިލްމުތަކުގައި ވެސް މަސައްކަތް ކުރަމުން އަންނަ އެކްޓަރެކެވެ. އެމްޓީވީގެ ޝޯ "ރޯޑީސް" ގައި ވެސް މިހާރު ހިއްސާވަމުން އަންނަ ސޯނޫ ދާދި ފަހުން ވަނީ އަމިއްލަ އަށް ޑައިރެކްޓްކޮށް ވެސް ފިލްމެއް ކުޅެފަ އެވެ. އެއީ އަންނަ ޖެނުއަރީ 10 ގައި ރިލީޒްކުރަން ހަމަޖެހިފައިވާ އެކްޝަން ތުރިލާ "ފަތޭ" އެވެ.
ފިލްމު ކުޅެގެން ލިބުނު މަޝްހޫރުކަމާއި ލޯތްބަށް ވުރެ ބޮޑު ލޯތްބެއް ސޯނޫ އަށް ލިބުނީ ކޮވިޑްގެ ވަބާގެ ތެރޭގައި ހިލޭ ސާބަހަށް އެކި ގޮތްގޮތުން އިންސާނިއްތަށް އެހީވެގެންނެވެ. އެކަމާ ގުޅިގެން އޭނަގެ އަގުވަޒަންކޮށް މިހާތަނަށް އެތައް އެވޯޑެއް ވެސް އަރުވާފައިވެ އެވެ.