ކެންސަރު ބައްޔަށް ހާއްސަކޮށްގެން އަޅަން ނިންމާފައިވާ ހޮސްޕިޓަލްގެ އަމަލީ މަސައްކަތް އަންނަ އަހަރުގެ ތެރޭގައި ފެށޭނެކަމުގެ އުންމީދު އޮތް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ޖުމްހޫރީ ދުވަހުގެ މުނާސަބަތުގައި ދަރުބާރުގޭގައި ރޭ ބޭއްވި ޖަލްސާގައި އެ މަނިކުފާނު ވިދާޅުވީ ކެންސަރު ބައްޔަށް ފަރުވާ ދިނުމަކީ ހޮސްޕިޓަލެއްގެ ޑިޕާޓްމަންޓެއްގެ އަރިމަތީގައި ދެމުން އަންނަ ޖެހޭ ފަދަ ޚިދުމަތެއް ނޫން ކަމަށާއި، ބައެއް ބޭބޭފުޅުން ޖޯކު ޖެއްސެވިކަމުގައިވީ ނަމަވެސް، ރާއްޖޭގެ އަދުގެ ޙާލަތު އޮތް ގޮތުން ކެންސަރު ބަލީގެ ކަންކަމަށް ޚާއްޞަ، ފުލް-ފްލެޖު ހޮސްޕިޓަލެއް ހުންނަން ކޮންމެހެން ވެސް ޖެހޭ ކަމަށް ވިދާޅުވި އެވެ.
ރައީސް ވިދާޅުވީ އެކަން ހަގީގަތަކަށް ހެދުމަށްޓަކައި އެކުވެރި ދައުލަތަކާއެކު މަޝްވަރާ ކުރެވި ހަލުވި ދުވެލީގައި މަރުހަލާއަކަށް ފަހު މަރުހަލާއެއް ނިންމައި ފުރިހަމަ ކުރެވެމުން އަންނަ ކަމަށެވެ.
ކެންސަރު ހޮސްޕިޓަލަކީ 25 އަށް ބުރިއަށް ހަދަން ނިންމާފައިވާ ތަނެކެވެ. އަދި އެތަން އިމާރާތް ކުރަން ނިންމާފައި ވަނީ އައިޖީއެމްއެޗާ އިންވެގެން ހުންނަ ދަރުމަވަންތަ ހޮސްޕިޓަލްގެ ހުޅަނގުން އޮތް ޕާކިން އޭރިއާގަ އެވެ.
ކެންސަރު ހޮސްޕިޓަލަކީ ކުރިން ލ. އަތޮޅުގައި ކުރިއަށް ގެންދަން ކުރީގެ ސަރުކާރުން ނިންމި މަޝްރޫއެކެވެ. ނަމަވެސް އެ މަޝްރޫއު މާލެ އަށް ބަދަލުކުރީ މި ސަރުކާރުންނެވެ.