މާލޭގެ އިސްލާމީ މަރުކަޒު ފުރިހަމަ މަރާމާތެއް އަންނަ އަހަރު ކުރިއަށް ގެންދާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ރާއްޖޭގެ އެންމެ ބޮޑު މިސްކިތް ހުޅުވިތާ މިއަދު 40 އަހަރު ފުރުމާ ދިމާކޮށް މިނިސްޓަރު ސޯޝަލް މީޑިއާ ޕޯސްޓެއްގައި ވިދާޅުވީ އިސްލާމީ މަރުކަޒަށް 40 އަހަރު ފުރުމާ ގުޅިގެން ޚާއްޞަ ޖަލްސާއެއް ބޭއްވުމަށް ރައީސް ޑރ މުޢިއްޒު އިރުޝާދު ވެސް ދެއްވާފައިވާ ކަމަށެވެ. އަދި ރައީސް މަރުކަޒުގެ ކަންކަމަށް ރައީސް ޚާއްޞަ ސަމާލު ކަމެއް ދެއްވާ ކަމަށާއި އެތަނުގެ ފުރިހަމަ މަރާމާތެއް އަންނަ އަހަރު ކުރާނެ ކަމަށް ވެސް ޝަހީމު ވިދާޅުވި އެވެ.
"ރައްކާތެރިކަމާއެކު މަރުކަޒު ބަލަހައްޓާނެކަމުގެ ޔަޤީންކަން ވެސް] އަރުވަން." އޭނަ ވިދާޅުވި އެވެ.
އިސްލާމީ މަރުކަޒު ހުޅުވީ ނޮވެމްބަރު 11، 1984 ގަ އެވެ. އެއީ ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގަ އެވެ.
ޝަހީމްގެ ޕޯސްޓްގައި ވަނީ ހުރިހާ ދިވެހިން ލޯބިވާ އިސްލާމީ މަރުކަޒު ބިނާކޮށް ދެއްވީތީ މައުމޫނަށް ޝުކުރު ވެސް އަދާކުރައްވާފައިވެ އެވެ.
"އެއީ ޖީލެއްގެ ތަރުބިޔަތުގެ ރަމްޒު. ރާއްޖޭގެ އިސްލާމީ ޤައުމީ ޝަޚްޞިއްޔަތުގެ ނިޝާން. އިސްލާމީ ތަރުބިޔަތާއި ތަޢުލީމާއި ތަމްރީނުގެ ކިއްލާމ" އޭނަ ވިދާޅުވި އެވެ. "ރޯދަ މަސް އިޙުޔާކުރުމުގެ ޖަލްސާތަކާއި ޤައުމީ ޤުރުއާން މުބާރަތާއި އިމާމުން ތަމްރީނު ކުރުމާއި ޤައުމީ، ބައިނަލްއަޤުވާމީ އިސްލާމީ ކޮންފަރެންސްތަކާއި ޖަލްސާތަށް ހުއްޓުމެއްނެތި 40 އަހަރުގެ މުއްދަތަށް އެ ބިނާގެ ތެރޭގައި ހިނގަމުން އައި ބިނާ އަކީ އިސްލާމީ މަރުކަޒު."
އެ މިސްކިތް ބިނާކުރީ އިސްލާމީ ގައުމުތަކުގެ އެހީތެރިކަމާ އެކީގަ އެވެ. އެގޮތުން އިސްލާމީ މަރުކަޒަށް އެހީވި ގައުމުތަކުގެ ތެރޭގައި ސައޫދީ އަރަބިއާ، ބުރުނާއީ، ޕާކިސްތާން، މެލޭޝިއާ، ޔޫއޭއީ، މިސްރު އަދި ކުވައިތު ހިމެނެ އެވެ.
އިސްލާމީ މަރުކަޒީ އިސްލާމިކް މިނިސްޓްރީ ވެސް ހިންގަމުން އަންނަ ބިނާ އެވެ.