އިންޑިއާ އިން ކުޅުދުއްފުއްޓަށް މުދާ އެތެރެ ކުރުމާ ގުޅޭ ގޮތުން މަޝްވަރާކޮށްފި އެވެ.
މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މަޝްވަރާކޮށްފައި ވަނީ އެ ސިޓީގެ ވިޔަފާރިވެރިންނާ އެކީ ބޭއްވި ބައްދަލުވުމެއްގަ އެވެ. އެ ބައްދަލުވުމުގައި އިސްކޮށް ހުންނެވީ އެ ކުންފުނީގެ ސީއީއޯ މުހައްމަދު ވަޖީހެވެ.
އެގޮތުން ޕެރިޝަބަލް އަދި ޖެނެރަލް ކާގޯ އުފުލާ ބޯޓުތައް އިންޑިއާގެ ޓުޓިކޮރިން އިން ކުޅުދުއްފުއްޓަށް ގެންދަން ސީދާ ދަތުރުތައް ފެށުމާއި ގުޅޭގޮތުން މަޝްވަރާކޮށްފައިވާ ކަމަށް އެމްޕީއެލުން ބުންޏެވެ.
ކުޅުދުއްފުއްޓަކީ އުތުރުގެ ސަރަހައްދީ ބަނދަރު ވެސް އޮތް ސިޓީ އެވެ.
އިންޑިއާގެ ޓުޓިކޮރިންއިން ކުޅުދުއްފުށި ސިޓީއަށް ސީދާ ޕެރިޝަބަލް މުދާ އެތެރެކުރުމުގެ މަގު ތަނަވަސްވާން ފަށައިފި އެވެ. މިކަމާ ގުޅޭ ގޮތުން އެމްޕީއެލްގެ އިސްވެރިން ވަނީ ކުޅުދުއްފުށީގެ ވިޔަފާރިވެރިންނާ ބައްދަލުކޮށް މަޝްވަރާކޮށްފަ އެވެ.
އެމްޕީއެލް އަންނަނީ ޓުޓިކޮރިންއިން އައްޑު އަށް މުދާ އެތެރެ ކުރަމުންނެވެ. އެއީ އައްޑޫ ޕޯޓް މެދުވެރިކޮށެވެ. އައްޑު އަށް ކުރިން ޕެރިޝަބަލް މުދާ އެތެރެކުރަމުން އައީ ލަކުޑި ބޯޓުތަކުގައި ކަމަށް ވިޔަސް މިހާރު އެ ދަތުރުތައް ކުރަނީ ދަގަނޑު ބޯޓުފަހަރުގަ އެވެ.