ރައްޔިތުންގެ ބާރުތައް ދަމަހައްޓަން މިއަދު އާ ހިތްވަރަކާ އެކު މަސައްކަތް ކުރަން ޖެހޭ ކަމަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ވިދާޅުވެއްޖެ އެވެ.
މިއަދު ފާހަގަކުރާ ޖުމްހޫރީ ދުވަހުގެ ތަހުނިޔާ ވިދާޅުވެ ސޯޝަލް މީޑިއާ ޕޯސްޓެއްގައި އެ މަނިކުފާނު ވިދާޅުވީ ދައުލަތުގެ ބާރުތައް ރައްޔިތުންގެ ކިބައިން ފެށިގެން އަން ނައިރު އެ ބާރުތައް ދަމަހައްޓަން މިއަދު އާ ހިތްވަރަކާ އެކު މަސައްކަތް ކުރަން ޖެހިފައިވާ ކަމަށެވެ.
"ގައުމުގެ އެންމެހާ ކަންކަމުގައި ރައްޔިތުންނަށް ލިބިދީފައިވާ ބާރުތައް ދެމެހެއްޓުމަކީ ޖުމްހޫރިއްޔަތެއްގެ އެންމެ މުހިންމު އަސާސްކަމުގައި ވީހިނދު، މިއަދު މި ވަނީ މި މަސައްކަތް އާ ހިތްވަރަކާއެކު ކުރަން ޖެހިފައި." އިބޫ ވިދާޅުވި އެވެ.
އެ މަނިކުފާނު މި ގޮތަށް ވިދާޅުވި އިރު، މިހާރުގެ ސަރުކާރުން ކަންކަން ކުރަމުން އަންނަ ގޮތަށް އެމްޑީޕީން އަންނަނީ ވަރަށް ބޮޑަށް ފާޑު ކިޔަމުންނެވެ. އެގޮތުން އެފަދަ މައްސަލަތަކުގައި އަޑު އުފުލަން މާދަމާ ރޭ "ފުދިއްޖެ-ފުނޑިއްޖެ" ގެ ނަމުގައި މާލޭގައި ހަރަކާތެއް ބާއްވަން އެ ޕާޓީން މިހާރު އަންނަނީ ތައްޔާރުވަމުންނެވެ.