ބޮލީވުޑްގެ ބަތަލާ އާލިއާ ބަޓާ އެކު ފިލްމެއް ހަދަން އުޅޭ ވާހަކަ ދެކުނުގެ ޑައިރެކްޓަރު ނާގް އަޝްވިން ދޮގުކޮށްފި އެވެ.
އިއްޔެ އިންޑިއާގެ ބައެއް މީޑިއާތަކުން ބުނެފައި ވަނީ އޭނަ އާލިއާއާ އެކީ ހަދަން ނިންމާފައި ވަނީ އަންހެން ކެރެކްޓާއަކަށް ބިނާކޮށް ހަދަން ހަމަޖެހިފައިވާ ފިލްމެއް ކަމަށާއި އޭގެ ޝޫޓިން އަންނަ އަހަރުގެ މެދުތެރޭގައި ފަށަން ޕްލޭން ކުރަމުން އަންނަ ކަމަށެވެ.
އަޝްވިން އަކީ މި އަހަރުގެ ޖޫންގައި ޕްރަބާސް އާއި ދީޕިކާ ޕަދްކޯންގެ އިތުރުން އަމީތާބް ބައްޗަންގެ ސައިންސް ފިކްޝަން ފިލްމު "ކަލްކީ 2898 އޭޑީ" ގެނެސްދިން ޑައިރެކްޓަރެވެ.
އާލިއާ ހިމަނައިގެން އޭނަ ފިލްމެއް ހަދަން އުޅޭ ވާހަކައާ ގުޅޭ ގޮތުން ހުނަރުވެރި ޑައިރެކްޓަރު މިއަދު ބޮލީވުޑް ހަންގާމާ އަށް ބުނީ އެއީ ތެދު ވާހަކައެއް ނޫން ކަމަށެވެ. އަދި އެއީ ބައެއް މީޑިއާތަކުން ފެތުރި ވާހަކައެއް ކަމަށް ވެސް ބުންޏެވެ.
"އަހަރެންގެ ދެން އޮތް ފިލްމަކީ ކަލްކީ ސީކްއެލް. އެހެންވެ އިތުރު އެއްވެސް ޕްރޮޖެކްޓަކާ ގުޅޭ އެއްވެސް މަސައްކަތެއް ނުކުރަން." އަޝްވިން ބުންޏެވެ.
އާލިއާ މިހާރު އަންނަނީ ޔާޝްރާޖް ފިލްމްސް (ވައިއާރްއެފް) ގެ ސްޕައި ޔުނިވާސްގެ "އަލްފާ" ގެ މަސައްކަތް ކުރަމުންނެވެ. އަދި އޭނަ އަންނަ މަހުގެ ތެރޭގައި ޑައިރެކްޓަރު ސަންޖޭ ލީލާ ބަންސާލީގެ "ލަވް އެންޑް ވޯ" ގެ ކްރޫއާ ގުޅޭނެ އެވެ.
ނެޝަނަލް އެވޯޑް ހޯދާފައިވާ ބަތަލާގެ އެންމެ ފަހުގެ ފިލްމަކީ މިދިޔަ މަހު ރިލީޒްކުރި "ޖިގްރާ" އެވެ.