ލިވަޕޫލަށް ފުރައްސާރަކޮށް ވާހަކަ ދެއްކި ރެފްރީއެއް ކަމަށްވާ ޑޭވިޑް ކޫޓް ސަސްޕެންޑް ކޮށްފި އެވެ.
ލިވަޕޫލް އާއި އެ ކްލަބުގެ ކުރީގެ ކޯޗު ޔާގަން ކްލޮޕަށް އަމާޒުކޮށް ކޫޓް ބޭއަދަބީ ބަސްތައް ބޭނުންކުރި ވީޑިއޯއެއް ސޯޝަލް މީޑިއާގައި އިއްޔެ އާންމުވުމާ ގުޅިގެން ރެފްރީންގެ ކަންކަން ބަލާ މައި ޖަމިއްޔާ ޕީޖީއެމްއޯއެލް އިން ވަނީ މައްސަލަ ތަހުގީގުކޮށް ނިމެންދެން އޭނާ ސަސްޕެންޑްކޮށްފަ އެވެ.
ކޫޓް ލިވަޕޫލާއި ކްލޮޕަށް އަމާޒުކޮށް ބޭއަދަބީ ބަހުން ވާހަކަ ދައްކާފައިވަނީ އެޓީމުން 2020 ވަނަ އަހަރު ބާންލީއާ ދެކޮޅަށް ކުޅެ، 1-1 އިން އެއްވަރުވި މެޗަށް އަމާޒުކޮށެވެ. އެ މެޗުގައި ކޫޓް ރެފްރީކަން ކޮށްފައިވާ އިރު، މެޗަށްފަހު ލިވަޕޫލް ކޯޗު ކްލޮޕް ވަނީ ރެފްރީއަށް ވަރަށް ބޮޑަށް ފާޑުކިޔާފަ އެވެ.
ކޫޓަކީ 2018 ވަނަ އަހަރުން ފެށިގެން ޕްރިމިއާ ލީގުގައި ރެފްރީކަން ކުރަމުން އަންނަ ތަޖުރިބާކަރު ރެފްރީއެކެވެ. އޭނާ ވަނީ މިދިޔަ ހަފުތާގައި ލިވަޕޫލާއި އެސްޓަން ވިލާއިން ވާދަކުރި މެޗުގެ ރެފްރީކަންވެސް ކޮށްފަ އެވެ.