މި ސަރުކާރުން ވެފައިވާ ވައުދުތައް ފުއްދާ މަންޒަރު ފެންނަން ފެށުމުން އިދިކޮޅު ފަރާތްތައް މޭކަރާނެ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުލްރަހީމް އަބްދުﷲ ވިދާޅުވެއްޖެ އެވެ.
ޕީއެންސީ އަށް މެމްބަރުން އިތުރުކުރުމަށް ފާއިތުވި ދެ ދުވަހު ކުރިއަށް ގެންދިޔަ ހަރަކާތް ނިންމާލުމަށް ފަހު ގޮތުން ނޫސްވެރިންނާ ވާހަކަދައްކަމުން އަބްދުލްރަހީމް ވިދާޅުވީ ރައީސް ޑރ. މުހައްމަދު މުއިއްޒު ރިޔާސީ އިންތިހާބުގެ ކެމްޕޭނުގައި ވެވަޑައިގެންނެވި ވައުދުތައް ރަނުން ރަނަށް ފުއްދާނެ ކަމަށެވެ.
"އެ ވައުދުތައް ފުދެމުން އަންނަ މަންޒަރު އިދިކޮޅު ފަރާތްތަކަށް ފެނުނީމަ އަދި މިހާރަށް ވުރެ ބޮޑަށް މޭކަރާނެ،" އަބްދުލްރަހީމް ވިދާޅުވި އެވެ.
އަބްދުލްރަހީމް ވިދާޅުވީ ވާދަވެރިން މޭކެރި ނަމަވެސް ރައްޔިތުންނަށް ހިދުމަތް ކުރުން ފިޔަވާ އެހެން ނިޔަތެއް ސަރުކާރުގައި ނެތް ކަމަށެވެ. ރައްޔިތުން ވެސް ކަތި ފިޔަވަޅެއް ނާޅައި މިހާރު ކުރިއަށްދާ މަގުން ކުރިއަށް ދިޔުމަށް އެދިވަޑައިގަންނަވާ ކަމަށާއި ދިވެހިންގެރާއްޖެ އަށް ދާން ފެށި ދަތުރު ކާމިޔާބު ދަތުރަކަށް ހެދުމަށް ހުރިހާ ރައްޔިތުންގެ އެއްބާރުލުން ރައީސް މުއިއްޒަށް ބޭނުންވާ ކަމަށްވެސް ވިދާޅުވި އެވެ.
މި ސަރުކާރަށް އެއް އަހަރު ފުރުމާ ދިމާކޮށް، މި މަހުގެ 17 ގެ ނިޔަލަށް ޕީއެންސީ އަށް 75،000 މެމްބަރުން ހަމަކޮށް، ރާއްޖޭގެ އެންމެ ބޮޑު ސިޔާސީ ޕާޓީއަށް ވުމަށް އެ ޕާޓީން އަންނަނީ މަސައްކަތް ކުރަމުންނެވެ. އެގޮތުން މެމްބަރުން އިތުކުރުމުގެ ހަރަކާތްތައް ރާއްޖޭގެ ހުރިހާ ކަންކޮޅެއްގައި ވެސް ޕީއެންސީން އަންނަނީ ކުރިއަށް ގެންދަމުންނެވެ.
ޕީއެންސީން ބުނާގޮތުން އެ ޕާޓީގެ މެމްބަރުންގެ އަދަދު މިހާރު ވަނީ 60،000 އިން މައްޗަށް އަރާފަ އެވެ.