އާ ސެކިއުރިޓީ ފީޗާ ހިމެނޭ ޑޮމެއިން ނަމްބަރަށް ބަދަލުކުރުމުގެ ފުރުސަތު ޓްރާންސްޕޯޓް މިނިސްޓްރީން ހުޅުވާލައިފި އެެވެ.
މިކަމަށް މި ހުޅުވައިލީ އެއްގަމު ވެހިކަލްތަކުގެ ޑޮމެއިން ބޭނުންކުރުމުގެ ޤަވާއިދަށް އިސްލާހު ގެނައުމަށްފަހު އެވެ. ގަވައިދަށް ގެނައި އިސްލާހުގައި ވަނީ އިންޖީނުލީ ވެހިކަލް ރަޖިސްޓްރީ ނަންބަރުގެ ބަދަލުގައި ޑޮމެއިން ނަންބަރު ބޭނުންކުރަން ބޭނުންވާ ފަރާތްތަކަށް ޑޮމެއިން ނަންބަރު ޖެހިދާނެ ކަމަށެވެ.
ޑޮމެއިން ނަންބަރު ބޭނުންކުރާ އިރު އެކަމާބެހޭ ހުއްދަ އުޅަނދުގައި ނުވަތަ ދުއްވާ މީހާގެ އަތުގައި ފަސޭހައިން ފެންނާނެހެން އޮންނަން ވާނެ ކަމަށް ޤަވާއިދުގައިވެއެވެ. އަދި ޑޮމެއިން ބޭނުން ކުރުމަށް ރަޖިސްޓްރީކޮށްފައިވާ ވެހިކަލް ނޫން އެއްޗެއްގައި ޑޮމެއިން ބޭނުން ކުރުން މަނާވާނެ އެށެވެ.
ޑޮމެއިން ރަޖިސްޓްރީކުރުމާއި އުޅަނދުގައި ޑޮމެއިން ބޭނުންކުރުމުގެ ހުއްދައާއި ޑޮމެއިންގެ ވެރިފަރާތް ބަދަލުކުރުމުގެ ހުއްދައާއި ޑޮމެއިން ދޫކޮށްފައިވާ އުޅަނދު ބަދަލުކުރުމަށް 500ރ. ރުފިޔާގެ ފީއެއް ދައްކަން ޖެހެ އެވެ.
ވެހިކަލްތަކުގައި ބޭނުން ކުރަން ކުރިން ދޫކޮށްފައިވާ ޑޮމެއިން ނަންބަރުތައް އަލަށް ތައާރަފުކުރާ ޑޮމެއިންތަކަށް ބަދަލުކުރަން ދެ މަސް ދުވަހުގެ މުއްދަތެއް ދޭން ވަނީ ނިންމައިފަ އެވެ. އަދި އެކަމަށް މި މަހުގެ 17 ވަނަ ދުވަހުން ފެށިގެން ހުށަހެޅޭނެ ކަމަށް މިނިސްޓްރީން ބުންޏެވެ.
މިކަމާ ބެހޭ އިތުރު މައުލޫމާތު 3343415 އަށް ގުޅައިގެން ހޯދޭނެ އެވެ.