އިޒްރޭލުން ފަލަސްތީނުގައި ހިންގަމުން ދަނީ ގަތުލުއާންމެއް ކަމަށާއި އެކަން ވަރަށް ބޮޑަށް ކުށްވެރި ކުރައްވާ ކަމަށް ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާން ވިދާޅުވެއްޖެ އެވެ.
އޭނަ އެގޮތަށް ވިދާޅުވީ ސައުދީގައި އިއްޔެ ފެށި މުސްލިމު އަދި އަރަބި ގައުމުތަކުގެ ލީޑަރުންގެ ސަމިޓްގަ އެވެ. އެ ސަމިޓްގައި ވާހަކަ ދައްކަވަމުން މުހައްމަދު ވަނީ އިޒްރޭލުން މިހާރު ލުބްނާނާއި އިރާނަށް ވެސް ދެމުންދާ ހަމަލާތައް ވަރަށް ބޮޑަށް ކުށްވެރި ކުރައްވައި، އެ ގައުމުގެ އެ އަމަލުތަކަށް ވަރަށް ބޮޑަށް ފާޑު ވިދާޅުވެފަ އެވެ.
"އެ ގައުމުތަކާ އެކީ ސައުދީ އޮންނާނެ. އަދި އެ ފަލަސްތީނާއި ލުބްބާނުންގެ އަހުންނާއި އުޙުތުންނަށް އިންސާނީ އެހީ ފޯރުކޮށް ދިނުމުގައި ސައުދީ ދެމިއޮންނާނެ." މުހައްމަދު ވިދާޅުވި އެވެ.
ފަލަސްތީނުގައި އިޒްރޭލުން ހިންގަމުން ދަނީ ގަތުލުއާންމެއްގެ ގޮތުގައި މުހައްމަދު ސިފަކުރެއްވި އިރު، މިއީ މިދިޔަ އަހަރުގެ އޮކްޓޯބަރު 7 އިން ފެށިގެން ޔަހޫދީން ގާޒާގައި ހިންގަމުންދާ ޖަރީމާތަކާ ގުޅިން ސައުދީގެ ވެރިޔަކު އިޒްރޭލާ ދެކޮޅަށް އެހާ ހަރުކަށިކޮށް ވާހަކަ ދެއްކެވި ފުރަތަމަ ފަހަރެވެ.
މުހައްމަދު ވަނީ އިޒްރޭލުން ގާޒާގައި ހިންގަމުންދާ ޖަރީމާތައް ވަގުތުން ހުއްޓާލައި ގާޒާ އާއި ހުޅަނގު އައްސޭރީން ޔަހޫދީން ސިފައިން ފޭބުމަށް ވެސް ގޮވާލައްވައިފަ އެވެ.
ސަމިޓްގައި ސައުދީގެ ފޮރިން މިނިސްޓަރު ފައިސަލް ބިން ފަރުހާބް އަލް ސައުދު ވިދާޅުވީ ދުނިޔެ އަށް މި ވަގުތު އެންމެ ބޮޑު ކަންބޮޑުވުމަކީ އިޒްރޭލު ހުއްޓުވަން ބައިނަލްއަގުވާމީ ދުނިޔެ ނުކުޅެދިފައި އޮތުން ކަމަށެވެ.
އިޒްރޭލުން ގާޒާގައި ހިންގަމުންދާ ގަތުލުއާންމުގައި މިހާތަނަށް 43،400 އަށް ވުރެ ގިނަ މީހުން ޝަހީދުކޮށްފައިވެ އެވެ. މީގެ ތެރެއިން 70 ޕަސެންޓަކީ ކުޑަކުދިންނާއި އަންހެނުންނެވެ.