އިންޑިއާގެ މަޝްހޫރު ފިލްމީ ތަރި، ޝާހްރުކް ޚާން މަރައިލާނެ ކަމަށް ބުނެ އިންޒާރު ދިން މީހާ ހައްޔަރުކޮށްފި އެވެ.
މީޑިއާތަކުން ބުނީ އެ މައްސަލައިގައި ހައްޔަރުކުރީ ޗަތިސްގަޅްގެ ރައިޕޫރަށް ނިސްބަތްވާ މުހައްމަދު ފައިޒަން ޚާން ކިޔާ 42 އަހަރުގެ ވަކީލެއް ކަމަށެވެ. ފުލުހުން ބުނެފައިވާ ގޮތުގައި އޭނަ އަކީ މީގެ ކުރިން ވެސް ޝާހްރުކް މަރައިލާނެކަމުގެ އިންޒާރު ދީފައިވާ މީހެކެވެ. އަދި އެންމެ ފަހުން އޭނަ އެފަދަ އިންޒާރެއް ދިނީ މިދިޔަ ހަފުތާގެ ތެރޭގަ އެެވެ.
އެގޮތުން ކާކުކަން ނޭނގޭ ގޮތަށް މުމްބާއީގެ ބަންޑްރާ ފުލުހުންނަށް ގުޅައި، ޝާހްރުކް މަރުން ސަލާމަތް ކުރަން ބޭނުންވާ ނަމަ 50 ލައްކަ ރުޕީސް ދޭން ވެސް ޑިމާންޑްކޮށްފައިވެ އެވެ.
މި މައްސަލައިގައި ފައިޒަން ހައްޔަރުކޮށް ތަހުގީގު ކުރަމުން އަންނަ އިރު.، ރައިޕޫރް ކޯޓްގައި ފުލުހުން ވަނީ ތަހުގީގު ނިމެންދެން އޭނަ ބަންދުގައި ބެހެއްޓުނުގެ އަމުރަކަށް ވެސް އެދިފަ އެެވެ.
ބޮލީވުޑްގެ ފިލްމީ ތަރިންގެ ތެރެއިން މި ފަހަކަށް އަައިސް ތަކުރާރުކޮށް މަރުގެ އިންޒާރު އެންމެ ބޮޑަށް ލިބެމުން ދަނީ ސަލްމާން ޚާނަށެވެ. މިކަމާ ގުޅިގެން އޭނަގެ ސެކިއުރިޓީ ވެސް ވަރަށް ބޮޑަށް ވަނީ ވަރުގަދަކޮށްފަ އެެވެ.