ރައީސް ޑރ. މުޙައްމަދު މުޢިއްޒު، ބޫޓާންގެ ބޮޑުވަޒީރު ޝެރިން ތޮބްގޭއާ ބައްދަލުކުރައްވައިފި އެވެ.
ކޮޕް29 ގެ ހަވާސާގައި ކުރިއަށްގެންދިޔަ މި ބައްދަލުކުރެއްވުމުގައި ދެ ބޭފުޅުން ވަނީ، ކޮޕް29 އަށް ދެ ޤައުމުން ހިއްސާކުރާ ތަޞައްވުރާއި، މޫސުމީ ހަރަކާތްތެރިކަމާއި، އެއް ޤައުމުން އަނެއް ޤައުމަށް އެއްބާރުލުން ދެވިދާނޭ ގޮތްތަކާ ގުޅޭގޮތުން މަޝްވަރާކުރައްވާފަ އެވެ.
ރައީސް ވަނީ ދެ ޤައުމުގެ ޤުދުރަކީ ތަފާތުތަކާއެކު ވެސް ދެ ޤައުމުން ހިއްސާކުރާ އެކުވެރިކަން ފާހަގަކުރައްވާފަ އެވެ. އަދި ގްލޭޝިއަލް މެލްޓިން އާއި ކަނޑުގެ ލޮނުގަނޑު އުފުލުން ފަދަ، މޫސުމީ ބަދަލުތަކުން ކުރިމަތިވާ ހިރާސްތަކުގެ މައްޗަށް އެ މަނިކުފާނު ވަނީ އަލިއަޅުއްވާލައްވާފަ އެވެ.
ދުނިޔޭގެ ފުރަތަމަ ކާބަން-ނެގަޓިވް ޤައުމަކީ ބޫޓާންކަމުގައިވާތީ އާއި، މޫސުމީ ބަދަލުތަކުން ކުރާ އަސަރުތައް ކުޑަކުރުމަށް އެ ޤައުމުން ކުރާ އީޖާދީ މަސައްކަތްތައް ފާހަގަކުރައްވައި ރައީސް މުއިއްޒު ބޮޑުވަޒީރު ތޮބްގޭއަށް ތަހުނިޔާ ވިދާޅުވި އެވެ. އަދި މޫސުމީ މައްސަލަތަކުގައި، ޚާއްޞަކޮށް މޫސުމަށް އަންނަ ބަދަލުތަކުން ކުރާ ނޭދެވޭ އަސަރުތައް ކުޑަކުރުމަށް އަޑުއުފުލުމުގައި އެކުގައި މަސައްކަތްކުރުމަށް، ދެ ލީޑަރުންވަނީ އެއްބަސްވެވަޑައިގަންނަވާފަ އެވެ.
މި ބައްދަލުކުރެއްވުމުގައި ބޫޓާންގެ ބޮޑުވަޒީރު ވަނީ ދެ ޤައުމުން ގުޅިގެން މަސައްކަތްކުރުމަށް ތާއީދުކުރައްވައި މޫސުމީ މައްސަލަތަކުގައި ރައީސް އަދާކުރައްވާ އިސް ދައުރަށް ސާބަސްދެއްވާފަ އެވެ. އަދި މި މައްސަލައިގައި ބޫޓާނުން އީޖާދުކުރި ބައެއް ކާމިޔާބު ޙައްލުތައްވެސް ވަނީ ރައީސްއާ ހިއްސާކުރައްވާފަ އެވެ. މޫސުމީ މައްސަލަތަކުގައި ބޮޑެތި، މުއްސަނދި ޤައުމުތަކުން އަޅާ ފިޔަވަޅުތައް ހަރުދަނާކުރުމަށްޓަކައި، މޫސުމީ ބަދަލުތަކުގެ ނުރައްކަލަށް ހުށަހެޅިފައިވާ ޤައުމުތަކުން އެކުގައި މަސައްކަތްކުރުމުގެ މުހިންމުކަން ބޮޑުވަޒީރު ފާހަގަކުރެއްވި އެވެ.