މި ސަރުކާރުން ގާއިމު ކުރަން ނިންމަވާފައިވާ ފައިނޭންޝަލް ސެންޓަރު، އެޅުމުގެ މަގު ފަހިކުރުމަށް އިކޮނޮމިކް މިނިސްޓްރީން ގަތަރު ފައިނޭންޝަލް ސެންޓަރާއެކު އެއްބަސްވުމެއްގައި ސޮއިކޮށްފި އެވެ.
އެގޮތުން އަބޫ ދާބީ ގްލޯބަލް މާކެޓް ރެޖިސްޓްރޭޝަން އޮތޯރިޓީ (އޭޑީޖީއެމް) އާ އެކު ސަރުކާރުގެ ފަރާތުން ސޮއިކުރެއްވީ އިކޮނޮމިކް މިނިސްޓަރު މުހައްމަދު ސައީދެވެ. އޭޑީޖީއެމްގެ ފަރާތުން ސޮއިކުރެއްވީ ސީއީއޯ ހަމާދު ސަޔާހް އަލް މަޒޫރީ އެވެ.
އެއްބަސްވުމުގައި ސޮއިކުރުމުގެ ރަސްމިއްޔާތުގައި ސައީދު ވިދާޅުވީ މި އެއްބަސްވުމަކީ ރައީސް ޑރ މުހައްމަދު މުއިއްޒުގެ ތަސައްވުރާ އެއްގޮތަށް ރާއްޖޭގައި ބައިނަލްއަގުވާމީ މާލީ މަރުކަޒެއް ގާއިމުކުރުމުގެ މަސައްކަތަށް ކުރިއަށް އެޅުނު މުހިންމު ފިޔަވަޅެއް ކަމަށެވެ. އަދި މިއީ ގަތަރު ފައިނޭންސް ސެންޓަރުގެ ތަޖުރިބާ އާއި އިލްމު ހޯދުމުގެ އެއްބަސްވުމެއްގެ އިތުރަށް ރާއްޖެ އާއި ގަތަރުގެ މެދުގައި އޮތް ޒަމާންވީ އެކުވެރި ގުޅުން ރަމްޒުކޮށްދޭ އެއްބަސްވުމެއް ކަމަށް ވެސް ވިދާޅުވި އެވެ.
އެއްބަސްވުމުގެ ދަށުން ރާއްޖޭގައި މާލީ މަރުކަޒު ގާއިމުކުރުމަށް ބޭނުންވާ އިލްމު ފޯރުކޮށްދީ، މާލީ ހިންގުމުގެ ދާއިރާ އާއި، ރެގިއުލޭޓުކުރުމުގެ އޮނިގަނޑުތައް އެކުލަވައިލުމާއި، މާލީ މަރުކަޒުތައް ހިންގުމުގެ އިސްތިރާޖިއްޔާތައް އެކުލަވައިލުން ފަދަ ކަންކަމުގައި ގަތަރު މާލީ ސެންޓަރުން އެހީތެރިކަން ފޯރުކޮށް ދޭނެ އެވެ.
އެގޮތުން ދެ ގައުމުގެ މެދުގައި ބަދަލުކުރެވޭ އެހީއާއި އެއްބާރުލުމުގެ ތެރެއިން އިގުތިސާދީ ކުރިއެރުމާއި ތަރައްގީ ހާސިލުކުރެއްވި ދެ ގައުމަށް ވެސް މުހިންމު މަންފާތަކެއް ކުރިއަށް އޮތް ތަނުގައި ލިބޭނެ ކަމަށް މިނިސްޓްރީން ބުންޏެވެ.