ކުރީ ސަރުކާރާއި ގުޅޭ ގޮތުން ދައްކާ ވާހަކަތައް ބަލަންވީ ކަމަށާއި ޖަވާބުދާރީ ނުވެވޭނެ ކަމެއް ނޯންނާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމްޑީޕީން ރޭ މާލޭގައި ބޭއްވި ޖަލްސާގައި ވާހަކަފުޅުދައްކަވަމުން ސޯލިހު ވިދާޅުވީ ކުރީ ސަރުކާރާއި ގުޅޭގޮތުން ދައްކާ ވާހަކަތައް ނިކުމެ ބެލުމަށް ގޮވާލާ ކަމަށާއި ޖަވާބުދާރީ ނުވެވޭނެ އެއްވެސް ކަމެއް ކޮށްފައި ނޯންނާނެ ކަމަށެވެ.
"ވަރަށް ޔަގީންކަމާ އެކީ މި ދަންނަވަނީ. އެއްވެސް ވުޒާރާއަކުން ނޯންނާނެ ކޮށްފައެއް. އެއްވެސް ކުންފުންޏަކުން ކޮށްފައެއް ނޯންނާނެ. އެތާ ތިއްބެވި ބޭފުޅުންނަށް އެއަށް ޖަވާބުދާރީވެވޭނެ،" ސޯލިހު ވިދާޅުވި އެވެ.
ސޯލިހު ވިދާޅުވީ މި ސަރުކާރުން ސިޔާސީ މަގާމުތައް އިންތިހާ އަށް އިތުރުކޮށްފައިވާ ކަމަށާއި ޕްރޮޖެކްޓުތައް ހުރީ ހުއްޓިފައި ކަމަށެވެ. އަދި އެއްވެސް ކަމެއް ސަރުކާރުން ހާމަކުރަމުން ނުދާ ކަމަށާއި މީޑިއާތަކަށް އަންނަނީ ހުރަސް އަޅަމުން ކަމަށް ސޯލިހު ވިދާޅުވި އެވެ.
"މިވަރު އަޅުގަނޑުމެންނަށް ފުނޑިއްޖެ. އެމްޑީޕީ އަކީ އަނެއްކާވެސް ރައްޔިތުންގެ ހައްގުގައި ނިކުންނާނެ ޕާޓީ. އަޅުގަނޑުމެން އިރާދަކުރެވިއްޔާ ފަހަތަކަށް ނުޖެހޭނަން،" ސޯލިހު ވިދާޅުވި އެވެ.
ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވީ ދޮގާއި މަކަރާއި އޮޅުވާލުމުގެ ތެރެއިން ކަމަށާއި ވެވަޑައިގެންނެވި ވައުދުތައް ހުރި ގޮތަށް ހުރިއިރު، މި ސަރުކާރުން ކުރާ ކަމެއް "ހަރާން" ކަމަށް ސޯލިހު ވިދާޅުވި އެވެ. އަދި މި ސަރުކާރުން ކުރާ ކަމަކީ ބާރުތައް ޖަމާކުރުމުގެ މަސައްކަތް ކަމަށާއި ބާރުތައް ދޫކޮށްލުމަކީ ހުދުމުހުތާރު ވެރިންނަށް ކުރަން އުނދަގޫ ކަމެއް ކަމަށްވެސް ސޯލިހު ވިދާޅުވި އެވެ.