ފާހިޝް ކަންކަން ހުއްޓުވެން އޮތް ގޮތަކުން ހުއްޓުވައި ދެއްވުމަށް ކަމާބެހޭ ވެރިންނަށް، އިލްމުވެރިންގެ ގުޅުމުން ގޮވާލައިފި އެވެ.
ގިނަ އަދަދެއްގެ ދީނީ އިލްމުވެރިން ހިމެނޭ "އިލްމުވެރިންގެ ގުޅުން" އިން ނެރުނު ބަޔާނެއްގައި ބުނީ އަންހެނުންނާއި ފިރިހެނުންގެ އައުރަ މުޅިން ކަޝްފުވާފަދަ ކަންކަން ކުޅިވަރުގެ ނަމުގައި ކަމަށްވިޔަސް ނުވަތަ ވިޔަފާރި އާއި މަސައްކަތުގެ ނަމުގައި ކަމަށްވިޔަސް އިސްލާމީ މުޖުތަމައުއެއްގައި އެފަދަ ކަމަކަށް އެއްބާރުލުން ދިނުމަކީ ދައުލަތުގެ ވެރިންގެ ފަރާތުން ހިނގައިގެން ވާނެ ކަމެއް ނޫން ކަމަށެވެ.
އެފަދަ ކަންކަން ހުއްޓުވައި، މުޖުތަމަ އާއި ރައްޔިތުން ސަލާމަތްކޮށް ރައްކައުތެރި ކުރުމަކީ ވެރިންގެ މައްޗަށް އޮތް ދީނީ ވާޖިބެއް ކަމަށާއި އަދި ހަރާމް މަގުތައް އިހުތިޔާރު ކުރުމަކީ ރިޒުގުގެ ބަރަކާތް ކެނޑި ނުފުދިގެން އުޅުމަށް މެދުވެރިވާނެ ސަބަބެއް ކަމަށްވެސް ބުނެފައިވެ އެވެ.
"ވީމާ ﷲ ތައާލާ އިންސާނުންނަށް ދިރިއުޅުމަށް ކަނޑައަޅުއްވައި ދެއްވާފައިވާ އިމުން ބޭރުވާނެ ފަދަ އެންމެހާ އަމަލަކާއި ފާހިޝް ކަންކަން، ހުއްޓުވެން އޮތް ގޮތަކުން ހުއްޓުވައި ދެއްވުމަށާއި، ދިވެހި މުޖުތަމައު ﷲ ތައާލާގެ ކޯފާއާއި ހަލާކަށް ހުށަހެޅިފައި އޮތުމަށް ދޫކޮށް ނުލެއްވުމަށް، އެ މަސްއޫލިއްޔަތާއި ޒިންމާ ﷲ ތައާލާ އެބަޔަކާ މަތިކުރައްވާފައިވާ ވެރިންނަށް އިހުލާސްތެރިކަމާއެކު އިލްތިމާސް ކުރަމެވެ،" އެ ބަޔާނުގައިވެ އެވެ.
މީގެއިތުރުން އެ ބަޔާނުގައި ވަނީ ﷲ ތައާލާގެ ރަހުމަތުގެ ތަނަވަސްކަން ބޮޑުވެގެން ވުމާއެކު، އެކަލާނގެ އަޒާބުގެ ގަދަފަދަކަމާ މެދު ވެސް އިހުމާލުނުވުމަށް ވަނީ އިލްތިމާސްކޮށްފަ އެވެ.