ކުރިއަށް އޮތީ ރާއްޖޭގައި ބޮޑެތި ބިޔަ މަޝްރޫއުތައް ފެށިގެންދާނެ އަހަރު އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
އެޗްޑީސީގެ އެކި ޕްރޮޖެކްޓުތައް ލޯންޗުކުރުމަށް ރޭ ބޭއްވި ޖަލްސާގައި ވާހަކަދައްކަމުން ސައީދު ވިދާޅުވީ އަންނަ އަހަރު ރާއްޖޭގައި ބޮޑެތި ބިޔަ މަޝްރޫއުތަކެއް ފެށިގެންދާނެ ކަމަށާއި އަދި ރާއްޖޭގެ އިގްތިސާދަށް 6.5 ޕަސެންޓްގެ ކުރިއެރުމެއް އަންނާނެ ކަމަށް ވޯލްޑް ބޭންކުން ލަފާކުރާއިރު، ގާތްގަނޑަކަށް 7 ޕަސެންޓާއި ގާތްކުރާ އަދަދަދަކަށް ރާއްޖޭގެ އިގްތިސާދު އަންނަ އަހަރު ކުރިއަރާނެ ކަމަށް ގަބޫލުކުރާ ކަމަށެވެ.
މީގެ އެންމެ ބޮޑު އެއް ސަބަބަކީ އުމްރާނީ ގިނަ މަސައްކަތްތަކެއް ފެށިގެންދިޔުން ކަމަށާއި އެއާއެކު ހަރަކާތްތެރި އިގްތިސާދެއް ރާއްޖޭގައި އޮންނާނެ ކަމަށް ސައީދު ވިދާޅުވި އެވެ.
"މި އަންނަ އަހަރަކީ އަވަދިނެތި ރާއްޖޭގައި ދިވެހި ވިޔަފާރިވެރިން، ރާއްޖޭގެ އިގްތިސާދުގައި ހަކަތަ އުފެދިގެންދާނެ ކާމިޔާބު އަހަރަކަށް އިރާދަކުރެއްވިއްޔާ ވެގެން ދާނެ،" ސައީދު ވިދާޅުވި އެވެ.
ސައީދު ވިދާޅުވީ ނިމިގެން މިދާ އަހަރު ކުރިއަށް ދިޔައީ ވަރަށް ދަތި އުނދަގުލުގައި ކަމަށާއި ނަމަވެސް ޑރ މުހައްމަދު މުއިއްޒުގެ ހިކުމަތްތެރިކަމާއެކު މި ހާލަތު މެނޭޖު ކުރެވިފައިވާ ކަމަށެވެ. އަދި އުނދަގޫ ނުރައްކާތެރި ހާލަތެއްގައި ކުރިއަށް ދާއިރު، ހިތްދަތިކަން ބައެއް ފަހަރު ދިމާވާ ކަމަށާއި ނަމަވެސް އެހެން އަންނަ ކޮންމެ ހާލަތެއްގައި ވިޔަފާރިވެރިންނާއި ދިވެހި ރައްޔިތުން އަތުކުރި އޮޅާލާ ނުކުމެ ކުރާ މަސައްކަތުން ގައުމު ކުރިއަރައިދާކަން މާޒީން ފެންނަ ކަމަށްވެސް ވިދާޅުވި އެވެ.