މި ސަރުކާރުން ކުރިއަށް ގެންދަން ނިންމި ފުރަތަމަ ބޯހިޔާވަހިކަމުގެ މަޝްރޫޢު ހައުސިން ޑިވެލޮޕްމަންޓް ކޯޕަރޭޝަން އެޗްޑީސީ) އިން ރޭ އިއުލާންކޮށްފި އެވެ.
ހުޅުމާލެއަށް އިންގިލާބީ ބަދަލުތަކެއް ގެންނަން އަމާޒު ހިފައި، ފަރުމާކޮށްފައިވާ މި މަޝްރޫއުގެ ނަމަކީ "ޓްރާސްފޯމިން ޓުމޯރޯ" އެވެ. އެ އިފުތިތާކުރީ ހުޅުމާލޭ ސެންޓްރަލް ޕާކްގައި ބޭއްވި ހަފުލާއެއްގަ އެވެ.
މި ހައުސިން މަޝްރޫޢުގެ ދަށުންދެ ކޮޓަރި އާއި ތިން ކޮޓަރީގެ އެޕާޓްމަންޓާއެކު ދެ ސޯޝަލް ހައުސިން ޔުނިޓް ގާއިމްކުރުމަށް ހަމަޖެހިފައިވެ އެވެ. މީގެ ތެރެއިން ތިން ކޮޓަރީގެ 1،020 އެޕާޓްމަންޓް ހަދަން ހަމަޖެހިފައިވާ އިރު، ދެ ކޮޓަރީގެ 680 އެޕާޓްމަންޓް ހަދާނެ އެވެ.
އެޗްޑީސީން ބުނީ މި މަޝްރޫއުގެ ތެެރެއިން ޕާކްކުރާނެ ޖާގަ އާއި ވިޔަފާރީގެ އުސޫލުން ހިންގުމަށް ދޫކުރާނެ ތަންތަން ވެސް ހިމެނޭނެ ކަމަށެވެ.
މީގެ ތެރޭގައި ސްމާޓްވެއާ ހައުސް ކޮމްޕްލެކްސް އާއި ފަރުކޮޅުފުށީގައި ތަރައްޤީކުރުމަށް ހަމަޖެހިފައިވާ އެޕާޓްމަންޓްތަކާއި ހޮޓާތައް ހިމެނެއެވެ. އަދި އެޗްޑީސީގެ ޒަމާނީ އޮފީހެއް ތަރައްޤީކުރުމާއި، އެސްއެމްއީ އިމާރާތެއް އެޅުމުގެ އިތުރުން ގަލުފަޅުގައި ލަގްޒަރީ ވިލާތަކެއް ތަރައްގީ ކުރަން ވެސް ވަނީ ޕްލޭންކޮށްފަ އެވެ.
އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ވިދާޅުވީ މި މަޝްރޫއާ އެކީ ޤައުމުގެ އިގުތިސާދު މުޅިން އައު ހަރުފަތަކަށް ޖެހިލައި ހުޅުމާލޭގެ ރައްޔިތުންގެ ދިރިއުޅުމަށް ފަސޭހަ ފުރުސަތުތަކެއް ލިބިގެންދާނެ ކަމަށެވެ. އަދި މިއީ ޖުމްލަކޮށް އެޗްޑީސީގެ ކުރިއެރުމާ ހުޅުމާލޭގައި ދިރިއުޅޭ ހުރިހާ ރައްޔިތުންނަށް ފަސޭހަކުރުމާއި އަދި ވިޔަފާރިވެރިންނަށް ހާއްސަ ގޮތެގައި ފަހި ފުރުސަތުތަކެއް ފަހިވެގެން ދާނެ މަޝްރޫއެއް ކަމަށް ފަޒުލް ވިދާޅުވި އެވެ.
އޭނަ ވިދާޅުވީ މި މަޝްރޫޢުގެ ދަށުން އެސްއޯއީ ބިލްޑިން ކުރިއަށް އޮތް ތަނުގައި ވިޔަފާރި ހިންގުމަށް އޮފީސް ލިބޭނެ ކަމަށާއި އެޗްޑީސީގެ ޒަމާނީ އޮފީސް އިމާރާތުގެ ސަބަބުން ބޭރުގެ ފަރާތްތަކަށާއި ރައްޔިތުންގެ އިތުރުން އެޗްޑީސީގެ މުއައްޒަފުންނަށް ވެސް ވަރަށް ބޮޑު ފަސޭހަތަކެއް ލިބިގެން ދާނެ ކަމަށެވެ.
އެޗްޑީސީން ލޯންޗުކޮށްފައިވާ ބައެއް ޕްރޮޖެކްޓްތަކަކީ:
• ސްމާޓް ވެއަރ ހައުސް ކޮމްޕްލެކްސްއެއް ބިނާކުރުން
• ރޯ ހައުސް ޕްރޮޖެކްޓް ހުޅުމާލޭ ފޭސް 2 ގައި ޤާއިމުކުރުން (ޕްރައިވެޓް ޕޫލާ، ރެސްޓޯރެންޓް އަދި ޖިމާއެކު)
• ފަރުކޮޅުފުށި ތަރައްޤީކުރުން (އެޕާޓްމަންޓްތަކާއި ހޮޓެލްތަކާއެކު)
• 2 ކޮޓަރި އާއި 3 ކޮޓަރީގެ އެޕާޓްމަންޓާއެކު 2 ސޯޝަލް ހައުސިންގ ޔުނިޓް ޤާއިމުކުރުން
• ރާއްޖޭގެ ތާރީހާއި ބެހޭ މައުލޫމާތު ފޯރުކޮށްދޭ ސެންޓަރެއް ޤާއިމުކުރުން
• ކުޑަގިރި އިތުރަށް ތަރައްޤީ ކުރުން
• ޕްރައިވެޓް ގެސްޓް ހައުސްތަކަށް ޚާއްސަ ރަށެއް ތަރައްޤީކުރުން
• މުނިފޫހިފިލުވުމަށް ޚާއްސަ ރަށެއް ތަރައްޤީ ކުރުން (ބީޗް ސިނަމާއި ވޯޓަޕޫލް، އެކި ކުޅަވަރު ކުޅެވޭ ގޮތަށް)
• ކޭމްޕިންގއަށް ދިޔުމަށް ވަކި ޚާއްސަ ރަށެއް ތަރައްޤީ ކުރުން
• ގަލުފަޅުގައި ނޫވެލިގެ ނަމުގައި ލަގްޒަރީ ވިލާތަކެއް ތަރައްޤީ ކުރުން
• މޯޑަން ޕްރީފެބް ހޯމް ޤާއިމުކުރުން
• އެސްއެމްއީ ބިލްޑިން ޤާއިމުކުރުން
އައިލް އެޑްވާންޗަ ޕާކްގެ ޑިޒައިން ކޮންސަލްޓަންސީ އަދި އޮޕަރޭޝަނަށް ތަމްރީނު ފޯރުކޮށް ދިނުމަށް އެއްބަސްވުމެއްގައި ސޮއި ވެސް ސޮއިކޮށްފައިވެ އެވެ. ސިޓީ އިންވެސްޓްމަންޓްސް ޕްރައިވެޓް ލިމިޓަޑްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ޑިރެކްޓަރު ނަލިންދަ އަލަތުގަމޭ އެވެ. އެޗްޑީސީގެ ފަރާތުން ސޮއިކުރެއްވީ ފަޒުލް އެވެ.