ޓެކްނޮލޮޖީ ކުރިއަރަމުން އަންނަ ރާއްޖޭގައި ސައިބަ ކްރައިމްގެ ކުށްތައް ފުޅާވަމުންދާ ކަމަށާއި އެކަން ހުއްޓުމަކަށް ގެންނަން ޖެހޭ ކަމަށް ޕޮލިސް ކޮމިޝަނަރު އަލީ ޝުޖާއު ވިދާޅުވެއްޖެ އެވެ.
ފުލުހުންނާއި ނެޝަނަލް ސެންޓަރ ފޯ އިންފޯމޭޝަން ޓެކްނޮލޮޖީ (އެންސީއައިޓީ) ގުޅިގެން އަންނަ މަހު ބާއްވަން ހަމަޖެހިފައިވާ "ސައިބާ އެކްސްޕޯ 2024" ގެ ވެބްސައިޓް ލޯންޗް ކުރަން ރޭ ބޭއްވި ހަފުލާގައި ސީޕީ ވިދާޅުވީ މިއަދު ހުރިހާ މަސައްކަތްތަކެއް ވެސް ޑިޖިޓަލްކޮށް ކުރެވެމުން އަންނަ އިރު، މުޖުތަމައުގައި ދިރިއުޅޭ ފަރުދުން ސައިބރ ކްރައިމްގެ ޝިކާރައަކަށް ވާހިނދު، ފޫނުބެއްދޭ ވަރުގެ އަގު ބޮޑެތި ގެއްލުން ލިބި ޑާޓާތައް ގެއްލިގެން ދާ ކަމަށެވެ.
"މިކަމުގެ ސަބަބުން ދިރިއުޅުމުގައި ތަކުލީފުތައް އުފަލަން ޖެހޭ ފަހަރު ވެސް އާދޭ. އެހެންކަމުން މިކަން ހުއްޓުވުމަށް، އެންމެން އެކުގައި މަސައްކަތްކުރުމާއި، ގުޅިގެން މަސައްކަތްކުރުމަށް އިހަށްވުރެ އަދު މިވަނީ މުހިންމުވެފައި،" އޭނަ ވިދާޅުވި އެވެ. "އެގޮތުން އަމިއްލަ ކުންފުނިތަކާއި، ސަރުކާރުގެ އިދާރާތަކާއި، ތައުލީމާއި ތަރުބިއްޔަތުދޭ ތަންތަނުގެ މެދުގައި ގުޅުން ބަދަހިކުރުން ވަރަށް މުހިންމު."
ސީޕީ ވިދާޅުވީ މައުލޫމާތު ހިއްސާކުރުމަށް ނިޒާމުތައް ކަނޑައެޅުމާއި، ސައިބަ ކްރައިމްގެ ނުރައްކާތަކާއި، ޑިޖިޓަލް ސެކިއުރިޓީގެ ވަލްނަރަބިލިޓީސްތައް ދެނެގަތުމާއި، އެ ކަންކަން ހައްލުކުރުމަށް ރައްޔިތުންނާ ގުޅިގެން މަސައްކަތްކުރަން މަސައްކަތްތަކެއް ކުރަން ޖެހޭ ކަމަށެވެ.
އެގޮތުން ރައްކާތެރި ސައިބަ ވެއްޓެއް ގާއިމުކުރުމަށް ޕަބްލިކް އަދި ޕްރައިވެޓް ސެކްޓާގައި މަސައްކަތް ކުރާ ފަރާތްތައް އެކުގައި މަސައްކަތްކޮށް، ބެސްޓް ޕްރެކްޓިކްސްތަކާ ޕޮލިސީސްތައް ތައްޔާރުކޮށް ރައްކާތެރި ޑިޖިޓަލް މާހައުލެއް ގާއިމު ކުރުމަށް ލަނޑުދަނޑި ކަނޑައެޅުން މިއަދު ވަރަށް މުހިންމުވެފައިވާ ކަމަށް ވިދާޅުވި އެވެ.
ސީޕީ ވިދާޅުވީ މިހާރު ދިވެހި ރައްޔިތުންގެ އަމާޒަކަށްވާންވީ، ސައިބަ ސެކިއުރިޓީގެ ފަންނުވެރިން މަދު އިރު، އެ ދާއިރާއަށް އައު ފަންނުވެރިން ތައާރަފުކޮށް ހިތްޖެއްސުން ކަމަށާއި ސައިބަ ސެކިއުރިޓިއަށާއި، ސައިބަ ކްރައިމްގެ އެންމެހައި ކަންތައްތަކަށް މީހުން އަހުލުވެރި ކުރުން ކަމަށެވެ.
"އަޅުގަނޑުމެންގެ ތުއްތު ތުއްތު ޅަދަރީންނާއި އިސްރަށްވެހީން ސައިބަރ ކްރައިމް އިން ރައްކާތެރިކުރުން. އެގޮތުން ސައިބަ ކްރައިމްގެ ގާނޫނުތަކާއި ގަވާއިދުތަކަށް ރައްޔިތުން އަހުލުވެރިކުރުވުން،" ޝުޖާއު ވިދާޅުވި އެވެ. "މިކަމުގެ ސަބަބުން އިންޓަނޭނަޝަލް ބެސްޓް ޕްރެކްޓިކްސްތަކާއި ގާނޫނުތަކަށް ލޯ ހުޅުވި، ދިވެހި ރާއްޖޭގެ ގާނޫނުތަކަށް އެކަށޭނަ ބަދަލުތައް ގެންނަން ފަސޭހަވެގެން ދާނެ."
"ސައިބާ އެކްސްޕޯ" ބާއްވަން ހަމަޖެހިފައިވަނީ އަންނަ މަހުގެ 10-13 އަށެވެ.