މަސްތުވާތަކެތި ބޭނުންކުރާ މީހުން ފަރުވާގެ ނިޒާމަށް ވެއްދުމަށް ފުލުހުންގެ ޑްރަގް އެންފޯސްމަންޓް ޑިޕާޓްމަންޓާއި ނެޝަނަލް ޑްރަގް އެޖެންސީ (އެންޑީއޭ) އިން ފެށި ޚާއްސަ އޮޕަރޭޝަނުގެ ތެރެއިން މިހާތަނަށް 47 މީހުން ފަރުވާގެ ނިޒާމަށް ވައްދާފައިވާ ކަމަށް އެންޑީއޭގެ ޗެއާޕާސަން ލުބްނާ މުޙައްމަދު ޒާހިރު ވިދާޅުވެއްޖެ އެވެ.
އެންޑީއޭ އިން އެ އޮޕަރޭޝަން ރަސްމީކޮށް ފެށީ މިދިޔަ މަހުގެ 22 ގަ އެވެ.
އެކަމާ ގުޅޭ ގޮތުން ލުބްނާ ވިދާޅުވީ އޮޕަރޭޝަން ކުރިއަށް ގެންދިޔުމަށް ނިންމާފައި ވަނީ ވަކި މުއްދަތެއް ނެތް ގޮތަށް ކަމަށެވެ.
"މި އޮޕަރޭޝަންގެ ދަށުން، މަގުމަތީ ސަލާން ޖަހަން އުޅޭ މަސްތުވާތަކެތި ބޭނުން ކުރާ މީހުންނާއި، ވައްކަމާއި ފޭރުމުގައި ހަރަކާތްތެރިވާ މަސްތުވާތަކެތި ބޭނުންކުރާ މީހުންނާއި، މަގުމަތީ މަސްތުގެ ހާލަތުގައި އުޅޭ މީހުންގެ އިތުރުން މިސްކިތްތަކުގައި ނިދާ މީހުންނާއި މަސްތުވާތަކެތި ބޭނުން ކުރާ މީހުން ބަންދުކޮށް އެ މީހުންނަށް ބޭނުންވާ ފަރުވާ ދިނުން." އޭނަ ވިދާޅުވި އެވެ.
ޑްރަގް އޮފެންޑަ ރިމާންޑް ސެންޓަރުގެ ފެސިލިޓީތައް ކ. ހިންމަފުއްޓާއި ހުޅުމާލޭގައި ޤާއިމުކޮށްފައިވެ އެވެ.
ލުބްނާ ވިދާޅުވީ ރިމާންޑް ސެންޓަރުތަކާ އެކު ގިނަ ހައްލުތަކެއް ލިބެމުން އަންނަ ކަމަށެވެ. އަދި މުޖުތަމައުގައި މަސްތުވާތަކެތި ބޭނުންކޮށްގެން ކުށްކުރާ މީހުން ހުއްޓުވުމަކީ އަމާޒެއް ކަމަށާއި ރައީސް ޑރ. މުހައްމަދު މުޢިއްޒުގެ މި ދައުރުގެ ތެރޭގައި މަސްތުވާތަކެތީގެ މައްސަލަތަކަށް ދާއިމީ ހައްލެއް ހޯދުމަށްޓަކައި ގިނަ މަސައްކަތްތަކެއް ކުރާނެ ކަމަށް ވެސް އޭނަ ވިދާޅުވި އެވެ.