ބޮލީވުޑްގެ ޒުވާން އެކްޓަރު ވިކީ ކޯޝަލް އަނެއްކާ ވެސް ވަރުގަދަ ބޮޑު ފިމްކަށް ސޮއިކޮށްފި އެވެ.
އިންޑިއާގެ ކުރީގެ ހަނގުރާމަވެރިއެއް ކަމަށްވާ ޗިރަންޖީވީ ޕަރުޝްރާމާ އަށް ބިނާކޮށް ހަދަން ނިންމާފައިވާ މި ފިލްމުގެ ނަމަކީ "މަހާވަތުރް" އެވެ. މި އަހަރު ރިލީޒްކޮށް ބޮކްސް އޮފީހުގައި ރެކޯޑް އާމްދަނީއެއް ހޯދި "އިސްތިރީ 2" ގެ ޑައިރެކްޓަރު އަމަރު ކޯޝިކް ޑައިރެކްޓްކުރަން ހަމަޖެހިފައިވާ މި ބޮޑު ބަޖެޓް ފިލްމަކީ ޕްރޮޑިއުސަރު ދިނޭޝް ވިޖަންގެ މެޑޮކް ފިލްމްސް އިން ހަދާ އެއްޗެކެވެ.
މިއީ އެ ސްޓޫޑިއޯ އަށް ވިކީ ސޮއިކުރި ތިން ވަނަ ފިލްމެވެ. ފުރަތަމަ ފިލްމަކީ މިދިޔަ އަހަރުގެ "ޒަރަ ހަޓްކޭ ޒަރަ ބަޗްކޭ" އެވެ. ދެވަނަ ފިލްމަކީ ރިލީޒްކުރުމުގެ ތައްޔާރީތައް ވަމުން އަންނަ ތާރީހީ ހަނގުރާމަ ފިލްމު "ޗާވާ" އެވެ. "މަހާވަތުރު" އާ އެއްގޮތަށް "ޗާވާ" އަކީ ވެސް ބޮޑު ބަޖެޓަކުން ވަރަށް ގްރޭންޑްކޮށް ހަދާފައިވާ ފިލްމެކެވެ.
މިއަދު މޯޝަން ޕޯސްޓަރު ވެސް ދައްކައިލި "މަހާވަތުރު" ސިނަމާތަކަށް ގެންނަން ނިންމާފައި ވަނީ 2026 ގެ ޑިސެމްބަރު މަހުގެ ތެރޭގަ އެވެ.
ނެޝަނަލް އެވޯޑް ވެސް ހޯދާފައިވާ ވިކީގެ އެންމެ ފަހުގެ ފިލްމަކީ ޖުލައިގައި ރިލީޒްކުރި ކާމިޔާބު ރޮމޭންޓިކް ކޮމެޑީ "ބޭޑް ނިއުސް" އެވެ. މަޝްހޫރު ބަތަލާ ކެޓްރީނާ ކައިފްގެ ފިރިމީހާ، ވިކީ މިހާރު އަންނަނީ ޑައިރެކްޓަރު ސަންޖޭ ލީލާ ބަންސާލީގެ "ލަވް އެންޑް ވޯ" ގެ މަސައްކަތް ކުރަމުންނެވެ.
ކާސްޓްގައި ދެމަފިރިން ކަމަށްވާ ރަންބީރް ކަޕޫރާއި އާލިއާ ބަޓް ވެސް ހިމެނޭ އެ ފިލްމު ސިނަމާތަކަށް ގެންނަން ނިންމާފައި އޮތީ 2026 ގެ ކުރީކޮޅު އެވެ.